مكتوبات | يگرمى آلتنجى مكتوب | 456
(438-490)

ايكنجى مسئله: شو آيتِ كريمه‌نڭ إشارت ايتديگى ”تعارف و تعاون“ دستورىنڭ بيانى ايچون ديرز كه: ناصلكه بر اوردو فرقه‌لره، فرقه‌لر آلايلره، آلايلر طابورلره، بولوكلره، تا طاقملره قدر تفريق ايديلير. تا كه؛ هر نفرڭ مختلف و متعدّد مناسباتى و او مناسباته گوره وظيفه‌لرى طانينسين، بيلينسين.. تا، او اوردونڭ أفرادلرى، دستورِ تعاون آلتنده، حقيقى بر وظيفۀِ عموميه گورسون و حياتِ إجتماعيه‌لرى، أعدانڭ هجومندن مصون قالسين. يوقسه تفريق و إنقسام؛ بر بولوك بر بولوگه قارشى رقابت ايتسين، بر طابور بر طابوره قارشى مخاصمت ايتسين، بر فرقه بر فرقه‌نڭ عكسنه حركت ايتسين دگلدر. عينًا اويله ده: هيئتِ إجتماعيۀِ إسلاميه بيوك بر اوردودر، قبائل و طوائفه إنقسام ايديلمش. فقط بيڭ بر بر برلر عددنجه جهتِ وحدتلرى وار. خالقلرى بر، رزّاقلرى بر، پيغمبرلرى بر، قبله‌لرى بر، كتابلرى بر، وطنلرى بر، بر، بر، بر.. بيڭلر قدر بر، بر...


ايشته بو قدر بر، برلر؛ اخوّتى، محبّتى و وحدتى إقتضا ايدييورلر. ديمك قبائل و طوائفه إنقسام، شو آيتڭ إعلان ايتديگى گبى، تعارف ايچوندر، تعاون ايچوندر.. تناكر ايچون دگل، تخاصم ايچون دگلدر!..


اوچنجى مسئله: فكرِ ملّيت، شو عصرده چوق ايلرى گيتمش. خصوصًا دسّاس آوروپا ظالملرى، بونى إسلاملر ايچنده منفى بر صورتده اويانديرييورلر؛ تا كه، پارچه‌لايوب اونلرى يوتسونلر.


سس يوق

مكتوبات