مكتوبات | يگرمى سكزنجى مكتوب | 518
(492-559)
بشنجى رساله اولان بشنجى مسئله

شكر رساله‌سى

بِسْمِ اﷲِ الرَّحْمٰنِ الرَّحِيمِ

وَ اِنْ مِنْ شَيْءٍ اِلاَّ يُسَبِّحُ بِحَمْدِهِ

قرآنِ معجز البيان، تكرار ايله {اَفَلاَ يَشْكُرُونَ ❊ اَفَلاَ يَشْكُرُونَ ❊ وَ سَنَجْزِى الشَّاكِرِينَ ❊ لَئِنْ شَكَرْتُمْ َلاَزِيدَنَّكُمْ ❊ بَلِ اﷲَ فَاعْبُدْ وَ كُنْ مِنَ الشَّاكِرِينَ} گبى آيتلرله گوسترييور كه: خالقِ رحمانڭ عبادندن ايستديگى أڭ مهمّ ايش، شكردر. فرقانِ حكيمده غايت أهمّيتله شكره دعوت ايدر. و شكر ايتمه‌مكلگى، نعمتلرى تكذيب و إنكار صورتنده گوستروب {فَبِاَىِّ اٰلاَءِ رَبِّكُمَا تُكَذِّبَانِ} فرمانيله، سورۀِ رحمانده شدّتلى و دهشتلى بر صورتده اوتوز بر دفعه شو آيتله تهديد ايدييور. شكرسزلگڭ، بر تكذيب و إنكار اولديغنى گوسترييور.


أوت قرآنِ حكيم ناصلكه شكرى نتيجۀِ خلقت گوسترييور؛ اويله ده قرآنِ كبير اولان شو كائنات دخى گوسترييور كه: نتيجۀِ خلقتِ عالمڭ أڭ مهمّى، شكردر. چونكه كائناته دقّت ايديلسه گورونويور كه: كائناتڭ تشكيلاتى شكرى إنتاج ايده‌جك بر صورتده هر بر شى، بر درجه شكره باقييور و اوڭا متوجّه اولويور. گويا شو شجرۀِ خلقتڭ أڭ مهمّ ميوه‌سى، شكردر. و شو كائنات فابريقه‌سنڭ چيقارديغى محصولاتڭ أڭ أعلاسى، شكردر. چونكه خلقتِ عالمده گورويورز كه؛ موجوداتِ عالم بر دائره طرزنده تشكيل ايديلوب، ايچنده نقطۀِ مركزيه اولارق حيات خلق ايديلمش. بتون موجودات حياته باقار، حياته خدمت ايدر، حياتڭ لوازماتنى يتيشديرر. ديمك كائناتى خلق ايدن ذات، اوندن او حياتى إنتخاب ايدييور.


سس يوق

مكتوبات