هم اوتوزنجى لمعه نامنده و آلتى نكته اولان رسالۀِ أسمايه باقه‌رق {بِاَسْمَائِكَ الْحُسْنٰى} دييوب، سائر إشاراتڭ قرينه‌سيله، هم يگرمى طوقوزنجى لمعه‌يه تعقيب قرينه‌سيله، هم ايكيسنڭ إسمده و أسماء لفظنه توافق قرينه‌سيله، هم تشتّتِ حاله و صيقنتيلى بر غربته و پريشانيته دوشن مؤلّفى، اونڭ تأليفى بركتيله تسلّى و تحمّل بولماسنه و معناىِ مجازى جهتنده، حضرتِ إمامِ على رضى اﷲ عنه لسانيله كندينه دعا اولان {وَ بِاَسْمَائِكَ الْحُسْنٰى اَجِرْنِى مِنَ الشَّتَتْ} يعنى ”إسمِ أعظم اولان او أسماء رساله‌سنڭ بركتيله، بنى تشتّتدن پريشانيتدن حفظ أيله يا ربّى!“ مئالى؛ تام تامنه او رساله و صاحبنڭ وضعيتنه توافق قرينه‌سيله كلام مجازى دلالت و إمامِ على رضى اﷲ عنه ايسه، غيبى إشارت ايدر دييه‌بيليرز.

هم مادام جلجلوتيه‌نڭ أصلى وحيدر و أسرارليدر و گله‌جك زمانه باقييور و غيبى امورِ إستقباليه‌دن خبر ويرييور. و مادام قرآن إعتباريله بو عصر دهشتليدر و قرآن حسابيله، رسالۀِ نور بو قراڭلق عصرده أهمّيتلى بر حادثه‌در. و مادام صراحت درجه‌سنده چوق قرينه و أماره‌لرله؛ رسالۀِ نور جلجلوتيه‌نڭ ايچنه گيرمش، أڭ مهمّ يرنده يرلشمش. و مادام رسالۀِ نور و أجزالرى بو موقعه لايقدر و حضرتِ إمامِ على رضى اﷲ عنهڭ نظرِ تقديرينه و تحسيننه و اونلردن خبر ويرمسنه لياقتلرى و قيمتلرى وار. و مادام حضرتِ إمامِ على رضى اﷲ عنه، سراج النوردن ظاهر بر صورتده خبر ويرديگندن صوڭره ايكنجى درجه‌ده، پرده‌لى بر طرزده سوزلردن، صوڭره مكتوبلردن، صوڭره لمعه‌لردن، رساله‌لرده‌كى عين ترتيب، عين مقام، عين نومرو تحتنده، قوّتلى قرينه‌لرڭ سَوقيله كلام دلالت و حضرتِ إمامِ على رضى اﷲ عنهڭ إشارت ايتديگنى إثبات أيله‌مش. و مادام باشده