امّا دابّة الأرض: قرآنده غايت مجمل بر إشارت و لسانِ حالندن قيصه‌جق بر إفاده، بر تكلّم وار. تفصيلى ايسه؛ بن شيمديلك، باشقه مسئله‌لر گبى قطعى بر قناعتله بيله‌مييورم. يالڭز بو قدر دييه‌بيليرم

{لاَ يَعْلَمُ الْغَيْبَ اِلاَّ اﷲُ} ناصلكه قَومِ فرعونه ”چكرگه آفاتى و بيت بلاسى“ و كعبه تخريبنه چاليشان قَومِ أبرهه‌يه ”أبابيل قوشلرى“ مسلّط اولمشلر. اويله ده: سفيانڭ و دجّاللرڭ فتنه‌لريله بيله‌رك، سَوه‌رك عصيان و طغيانه و يأجوج و مأجوجڭ آنارشيستلگى ايله فساده و جاناوارلغه گيدن و دينسزلگه، كفر و كفرانه دوشن إنسانلرڭ عقللرينى باشلرينه گتيرمك حكمتيله، أرضدن بر حيوان چيقوب مسلّط اولاجق، زير و زبر ايده‌جك. اﷲ أعْلَم، او دابّه بر نوعدر. چونكه غايت بيوك بر تك شخص اولسه، هر يرده هركسه يتيشمز. ديمك دهشتلى بر طائفۀِ حيوانيه اولاجق. بلكه {اِلاَّ دَابَّةُ اْلاَرْضِ تَاْكُلُ مِنْسَاَتَهُ} آيتنڭ إشارتيله، او حيوان، دابّة الأرض دينيلن آغاج قوردلريدر كه؛ إنسانلرڭ كميكلرينى آغاج گبى كميره‌جك، إنسانڭ جسمنده ديشندن طيرناغنه قدر يرلشه‌جك. مؤمنلر ايمان بركتيله و سفاهت و سوءِ إستعمالاتدن تجنّبلريله قورتولمسنه إشارةً، آيت، ايمان خصوصنده او حيوانى قونوشديرمش