بن او زمان إستانبولده بايزيد جامعنده نماز قيلاركن، {اِيَّاكَ نَعْبُدُ وَاِيَّاكَ نَسْتَعِينُ} ديدم. باقدم، او جامعده‌كى جماعت، بنم گبى دييه‌رك بو دعوامه و {اِهْدِنَا} ده‌كى دعامه تمامًا إشتراك ايدوب تصديق ايتدكلرى زمانده، بر پرده داها آچيلدى. گوردم كه؛ إستانبولڭ بتون مسجدلرى، بيوك بر بايزيد حكمنه گچديلر. عينًا بنم گبى {اِيَّاكَ نَعْبُدُ وَاِيَّاكَ نَسْتَعِينُ} دييوب بنم دعوالريمه و دعالريمه إمضا باصييورلر، آمين دييورلر. و بڭا بر نوع شفاعتجى صورتنى آلمالرى ايچنده، خيالمه بر پرده داها آچيلدى

گوردم كه؛ عالمِ إسلام، بيوك بر مسجد صورتنى آلدى. مكّه، كعبه محراب حكمنه گچدى. بتون نماز قيلان مسلمانلرڭ صفلرى، دائره‌وى بر طرزده او قدسى محرابه توجّه ايده‌رك، بنم گبى {اِيَّاكَ نَعْبُدُ وَاِيَّاكَ نَسْتَعِينُ اِهْدِنَا} دييوب، هر برى عموم نامنه هم دعا، هم دعوا، هم تصديق ايدر، هم اونلرى كندينه شفاعتجى ياپار. هم بو قدر عظيم بر جماعتڭ يولى، دعواسى ياڭليش اولاماز و دعاسى ردّ ايديلمز؛ شيطانى وسوسه‌لرى طرد ايدر دييه دوشونوركن و نمازده جماعتڭ بيوك منفعتلرينى بِالمشاهده تصديق ايدركن، بر پرده داها آچيلدى