هم بو مدارِ سُرور و فرح اولان هديۀِ نورانيه‌يى، بر حسِّ قبل الوقوع ايله بنم روحم تام حسّ ايتمش، عقله خبر ويرمه‌مش ايدى كه او گلمه‌دن ايكى گون أوّل، فيضى و أمينڭ فقره‌سنده بيان ايديلن رؤيايى گورديگم گيجه‌نڭ گوننده، صباحدن آقشامه قدر و ايكنجى گونى ده قسمًا، هيچ گورمه‌ديگم بر طرزده بر سوينج، بر سُرور حسّ ايدوب متماديًا بر بهانه ايله فرحمى إظهار ايدوب، اوتوز قرق دفعه تبسّم ايله گولدم.
    هم بن و هم فيضى چوق تعجّب و حيرت ايتدك. (حاشيه) اوتوز گونده بر دفعه گولمه‌ين، بر گونده اوتوز دفعه گولمك بزلرى حيرتده بيراقدى. شيمدى آڭلاشيلدى كه؛ او سُرور، او سوينج، مذكور معنوى فرمانى تمثيل ايدن معصوملرڭ و اُمّيلرڭ قلملرينڭ يازيلرى نسلِ آتينڭ صحائفِ حياتلرينه، عالمِ إسلامڭ صحيفۀِ مقدّراتنه و أهلِ ايمان إستقبالنڭ دفترلرينه نشرِ أنوار ايده‌جكلرينڭ و او معصوملرڭ خالص و صافى عمللرى و خدمتلريله صحيفۀِ أعمالمزده حسناتلرينى يازوب قيد ايتمه‌سنڭ و رسالۀِ النور شاكردلرينڭ مقدّراتنى مسعودانه إدامه‌سنڭ خبرينى ويرن، او داها گلمه‌ين هديه‌دن گلييوردى. بنم، او عظيم يكوندن حصّه‌مه دوشن بيڭدن بر جزئى روحًا حسّ ايديلمش، بنى مسرورانه هيجانه گتيرمش ايدى.
    أوت بويله يوزر معصوملرڭ مقبول عمللرى و ردّ ايديلمز دعالرى سائر قارداشلريمڭ دفترلرينه گچمه‌سى مِثللو، بنم گبى بر گناهكارڭ صحيفۀِ أعمالنه دخى گيرمه‌سى، بيڭلر سُرور و سوينج ويرر. بويله قراڭلق بر زمانده، بو آغير شرائط آلتنده بويله معصومانه و قهرمانانه چاليشمق ايچون بز، هم او معصوملرى و او اُمّيلرى و معلّملرينى تبريك، هم پدر و والده‌لرينى تبريك، هم كويلرينى تبريك، هم مملكتلرينى، هم ملّتلرينى، هم آناطولى‌يى تبريك ايدرز.
    مبارك معصوملرڭ و اُمّيلرڭ هر بريسنه برر خصوصى تشكّرنامه و تبريكنامه يازمق ألمدن گلسه ايدى يازاجقدم؛ اويله ايسه بو آرزومى بِالفعل يازيلمش گبى قبول ايتسينلر. بن اونلرڭ إسملرينى بر دائره صورتنده يازاجغم، دعا وقتنده باقاجغم. هم اونلرى رسالۀِ النورڭ خاص شاكردلرى دائره‌سنه داخل ايدوب، بتون معنوى قزانجلريمه حصّه‌دار ايده‌جگم.