(غايت أهمّيتليدر)
بِاسْمِهِ سُبْحَانَهُ  ❊  وَاِنْ مِنْ شَيْءٍ اِلاَّ يُسَبِّحُ بِحَمْدِهِ
    شدّتِ شفقت و رقّتدن، بو قيشڭ شدّتلى صوغوغيله برابر معنوى و شدّتلى بر صوغوق و مصيبتِ بشريه‌دن بيچاره‌لره گلن فلاكتلر، هلاكتلر، سفالتلر، آجلقلر شدّتله رقّتمه طوقوندى. بردن إخطار ايديلدى كه: بويله مصيبتلرده كافر ده اولسه حقّنده بر نوع مرحمت و مكافات واردر كه، او مصيبت اوڭا نسبةً چوق اوجوز دوشر. بويله مصيبتِ سماويه، معصوملر حقّنده بر نوع شهادت حكمنه گچييور.
    اوچ درت آيدر كه، دنيانڭ وضعيتندن و حربندن هيچ بر خبرم يوقكن آوروپاده روسيه‌ده‌كى چولوق چوجغه آجييه‌رق تخطّر ايتدم. او معنوى إخطارڭ بيان ايتديگى تقسيمات، بو أليم ألمِ شفقته بر مرهم اولدى. شويله كه:
    او مصيبتِ سماويه‌دن و بشرڭ ظالم قسمنڭ جنايتنڭ نتيجه‌سى اولارق گلن فلاكتدن وفات ايدن و پريشان اولانلر أگر اون بش ياشنه قدر اولانلر ايسه، نه دينده اولورسه اولسون شهيد حكمنده‌در. مسلمانلر گبى بيوك مكافاتِ معنويه‌لرى، او مصيبتى هيچه اينديرر.
    اون بشندن يوقارى اولانلر، أگر معصوم و مظلوم ايسه، مكافاتى بيوكدر؛ بلكه اونى جهنّمدن قورتارير. چونكه آخر زمانده مادام فترت درجه‌سنده دين و دينِ محمدى‌يه (ع‌ص‌م) بر لاقيدلق پرده‌سى گلمش و مادام آخر زمانده حضرتِ عيسى‌نڭ (ع‌س) دينِ حقيقيسى حكم ايده‌جك، إسلاميتله اوموز اوموزه گله‌جك. ألبته شيمدى، فترت گبى قراڭلقده قالان و حضرتِ عيسى‌يه (ع‌س) منسوب خرستيانلرڭ مظلوملرى چكدكلرى فلاكتلر، اونلر حقّنده بر نوع شهادت دينله‌بيلير. خصوصًا إختيارلر و مصيبتزده‌لر، فقير و ضعيفلر، مستبد بيوك ظالملرڭ جبر و شدّتلرى آلتنده مصيبت چكييورلر. ألبته او مصيبت، اونلر حقّنده مدنيتڭ سفاهتندن و كفرانندن و فلسفه‌نڭ ضلالتندن و كفرندن گلن گناهلره كفّارت اولمقله برابر، يوز درجه اونلره كاردر دييه حقيقتدن خبر آلدم. جنابِ أرحم الرّاحمينه حدسز شكر ايتدم. و او أليم ألمِ شفقتدن تسلّى بولدم.