بنم طرفمدن اونلرڭ پدر و والده‌لرينه ويا أقربا و استادلرينه سلاملريمى تبليغ ايديڭز. جنابِ حق اونلرى و أولادلرينى دنياده و آخرتده مسعود أيله‌سين، آمين.
    عموم قارداشلريمزه برر برر سلام و دعا ايدرز و دعالرينى قرآنڭ مدح و ثناسنه مظهر اولان بو ليالئِ عشر اولان اون گيجه‌لرده رجا ايدييورز. أمين و فيضى‌نڭ رؤيايه دائر فقره‌لرينى ده لفًّا گوندرييورز.
    إسپارطه‌ده‌كى قارداشلريمزه!
    لطيف بر رؤيانڭ، قدره عائد بر مسئله‌يى شهود درجه‌سنده بزه قناعت ويرديگى گبى، او لطيف رؤيانڭ جدّى ايكنجى پارچه‌سى، بزلره معنوى بر مژده و بشارت ويرديگى جهتله، سز قارداشلريمزه بيان ايدييورز. شويله كه:
    ايكى گون أوّل استاديمز رؤياده گورويور كه: بن يعنى فيضى ايله برابر گزمگه چيقييورز. گيدركن، بردن بن استاديمه سويله‌يورم كه: بورادن بن آيينڭ تسبيحنى طوپلايه‌جغم. استادم ده باقييور كه، بياض ايپلر گبى طولاشمش بر شى گورويور. بو عجيب گولديره‌جك سوزمدن و آيى‌يه تسبيح إسناد ايتمك وضعيتمدن چوق شدّتلى گوله‌رك اويانمش. اوياندقدن صوڭره ده گولمش. آقشامه قدر هيچ گورولمه‌مش بر طرزده، يگرمى اوتوز دفعه او حادثۀِ نوميه‌يى گوله‌رك بنمله ملاطفه ايتدى. مناسبت اولميان بعض شيلر ايله تعبيره چاليشدقسه ده، تعبيره مناسبت طوتمه‌دى. صوڭره ايكنجى گون، عادتِ مستمرّه‌ده، كندى تجربه‌سيله، رؤياىِ صادقه‌نڭ قسمًا عين گونده، قسمًا ايكنجى گونڭ عين ساعتنده بڭا بڭزه‌ين بر دوست (كه، رؤياده استاديمه بنم صورتمده گورونمش) استاديمزڭ ياننه گلدى ديدى كه: ”آيينڭ ياغنى طوپلايانلردن آلوب و مؤذّن و تسبيح ياپان بر آدمڭ توصيه‌سيله مهم بر آدمه، هر صباح خسته‌لق ايچون يوتمه‌سنى ناصل گورويورسڭ؟“ استاديمز ده، رؤياده گولديگى گبى عينًا اويله گولمش. بردن رؤيا خاطرينه گلوب بو عجيب و عين عيننه تعبيرى كمالِ تعجّب و حيرتله قارشيلايوب، اوڭا ديمش: ”صاقين إستعمال ايتمه‌سين.“