عزيز، صدّيق قارداشلرم!
    بتون روحِ جانمله بايرامڭزى تبريك ايدرم. و بو بايراممى چوق مباركلشديرن مبارك معصوملرڭ و محترم اُمّى إختيارلرڭ و استادلرينڭ بو دفعه گوندردكلرى قيمتدار رساله‌لرى بش جلد اولارق گوزلجه جلدلتديره‌رك تنظيم ايتدك.
    إن شاء اﷲ اونلردن چوق إستفاده ايديله‌جك. او مبارك معصوملرڭ و محترم اُمّيلرڭ معصومانه و خالصانه يازدقلرى رساله‌لر، رسالۀِ النورڭ كرامتنه يازيلرى ده بر كرامت علاوه ايتديگنى و أڭ گوزل يازيلردن زياده تأثيرلى اولديغنى حسّ ايدييورز.
    حتّى فيضى‌نڭ گوزلجه جلدلتديگى چوجقلرڭ توافقلى مجموعه‌سنى گتيرديگى وقت قولونجم زياده آغرييوردى. ديدم: ”امان قارداشم! بنم قولونجمى طوت، پك آغرييور.“ بردن او مجموعه‌يى آچدق، باقدق؛ بردن اويله بر شفا اولدى كه، قولونجمى اونوتدق. صوڭره تخطّر ايتدك، حيرت ايتدك. هم او رساله‌لرى يازانلرڭ إسملرينى، هم ياشلرينى، او بش مجموعه‌نڭ باشلرنده مدارِ عبرت و اونلره دعا ايتديرمك ايچون درج ايده‌جگز. اونلرى و خصوصًا استادلرينى و پدر و والده‌لرينى بنم طرفمدن برر برر، هم بو خدمتلرينى هم بايراملرينى تبريك ايديڭز.
    هم إسپارطه حقّنده بنم بيوك اميديمى فعلاً إثبات ايتدكلرى ايچون، بڭا بيوك بر تسلّى ويردكلرى ايچون، ئولونجه‌يه قدر منّتدارلغمى اونلره و مباركلر هيئتنه و مدرسۀِ نوريه و نور و گل فابريقه‌سى صاحبلرينه تبليغ ايديڭز.
    نماز تسبيحاتنڭ سرّينه گوره: ناصلكه نمازدن صوڭره تسبيح و ذكر و تهليل ايله بر ختمۀِ معظّمۀِ محمّديه (ع‌ص‌م) و ذكر و تسبيح ايدن و روىِ زمين قدر گنيش بر حلقۀِ تحميداتِ أحمديه (ع‌ص‌م) دائره‌سنه تصوّرًا و نيةً گيرمك مدارِ فيوضات اولديغى گبى؛ بن و بز ده، رسالۀِ النورڭ گنيش دائرۀِ درسنده و حلقۀِ أنوارنده درس آلان و دعا ايدن و چاليشان بيڭلر معصوم لسانلرڭ و مبارك إختيارلرڭ دعالرينه و أعمالِِ صالحه‌لرينه حصّه‌دار اولمق و دعالرينه آمين ديمك حكمنده اولارق، اونلرله طىِِّ مكان ايده‌رك، خيالاً اوموز اوموزه، ديز ديزه بولونمق خياليله و نيتيله و تصوّريله كنديمزى فوق الحدّ بختيار بيليورز. خصوصًا آخر عمرمده بويله قيمتدار، معصوم، معنوى أولادلرى و يوزر كوچك عبد الرحمانلرى بولمق، بنم ايچون دنياده بر جنّت حياتى حكمنه گچييور.