أوّلا: خسروڭ مكتوبى، رسالۀِ النوره خدمت ايده‌مديگى ايچون تأسّفنه مقابل اوڭا يازيڭز كه: خسروڭ جاذبه‌دار يازيلرى و نسخه‌لرى اونڭ يرنده پك پارلاق بر صورتده خدمت ايدييورلر.
    و خلوصينڭ يگرمى يدنجى مكتوبه گيرن مكتوبلرى دخى اونڭ بدلنه چاليشييورلر، وظيفه‌سنى قسمًا گورويورلر. و مرحومه والده‌سنه مخصوصًا دعا ايديله‌جك.
    و آيدينلى حسن عاطفڭ، حافظ علينڭ مكتوبنڭ حاشيه‌سنده يازديغى، مِثلى گورولمه‌مش شو دعا: ”يا رب! گولدير سعيدى، تا گولمه‌سندن گللر آچيلسين“ دييه پك غريب فقره‌سى، رسالۀِ النوره اونڭ صداقت و إخلاصنڭ عجيب بر كرامتيدر كه؛ اوتوز گونده بر دفعه گولمه‌ين او بيچاره سعيد، بر گونده اوتوز دفعه گولديگنڭ يازيلماسى و سزه او مكتوبڭ گوندريلمه‌سى زماننه تام تامنه توافق ايدييور.
    مرانغوز أحمدڭ، جدًّا بنى سرورله آغلاتديران و چوق مراقلريمى إزاله ايدن رسالۀِ النورڭ مبارك شاكردلرينڭ كرامتكارانه، بر گيجه‌ده اورايه گلن مكتوبلرى لازم گلن يرلره گوندرمك ايچون يازمالرى، بنى فوق العاده مسرور و متشكّر ايدن مكتوبى، بر كتاب قدر و اون مكتوب يرنده قبول ايتدك. مرحوم و قيمتدار و چوق وفاكار و فداكار و سكز سنه بڭا خدمت ايدن بر قارداشمز مرانغوز مصطفى چاوش يرينه، جنابِ حق رحمتيله، قهرمان مرانغوز أحمدى ويردى.
    نور فابريقه‌سنڭ صاحبى حافظ علينڭ مكتوبلرى، چوق اينجه و چوق يوكسك حسّياتنى و كرامتكارانه إخلاصنڭ درجه‌لرينى گوسترديگندن، پك اوزون بر مقابله ايستر. فقط شيمديلك بو قدر ديرز: او، عمومڭ حسابنه بزلرڭ بايرامنى تبريك ايتديگنه، بز ده اونى توكيل ايدوب، عموممز نامنه هر بر قارداشمزه تبريكى تكرار ايدييورز.
    مباركلر، طاهر ايله برابر؛ طاهرڭ بزه او قيمتدار قلميله جنّت طعاملرى گبى چوق طاتلى و حورى لباسى گبى چوق گوزل يازيلرى، بوراده هركسى لذّتله مطالعه‌يه سَوق ايدييور. حافظ علينڭ مكتوبنده، طاهرڭ يازديغى و گوندره‌جگى سوزلرى داها آلامدق. و اونڭ معصومه ايكى مبارك قيزلرينڭ يازدقلرى نسخه‌لر بوراده قادينلر، قيزلر عالمنده گزييور؛ گورنلرى رسالۀِ النوره جذب ايدييور. چوق چاليشقان و فداكار طاهرڭ كثرتلى هديه‌لرى، بزلرى چوق بورج آلتنده بيراقدى.