هم بو حال گوسترييور كه، رسالۀِ النور كوكله‌شييور. إن شاء اﷲ اونى هيچ بر شى قوپاراميه‌جق؛ أنسالِ آتيه‌ده ده دوام ايدوب گيده‌جك. عينًا بو معصوم كوچك شاكردلر گبى، رسالۀِ النورڭ جاذبه‌دار دائره‌سنه گيرن بو اُمّى إختيارلرڭ، قسمًا چوبانلرڭ و يوروك و أفه‌لرڭ بو زمانده، بو عجيب شرائط ايچنده هر شيئه ترجيحًا رسالۀِ النوره بو صورتده چاليشمالرى گوسترييور كه، بو زمانده رسالۀِ النوره أكمكدن زياده إحتياج وار كه؛ چيفتجيلر، چوبانلر، يوروك أفه‌لر (حاشيه) حاجاتِ ضروريه‌دن زياده بر حاجاتِ ضروريه‌يى، رسالۀِ النورڭ حقائقنى گورويورلر.“
* * *
    عزيز، صدّيق قارداشلرم!
    بو طرفده يول قپاندى، پوسته گلمه‌يوردى. سزلردن گله‌جك بر مكتوب ويا بر رساله‌ىى بكله‌يوردم. شيمدى روحمه بر إخطار ايله داها بكله‌ميه‌رك، بوراده حسنِ تأثيرينى گوسترن اوچ پارچه‌يى گوندرييورم. معصوملرڭ و اُمّى مبارك إختيارلرڭ و قهرمان طاهرينڭ نسخه‌لرى، دائمى پارلاق بر طرزده فتوحات ياپييورلر. يالڭز جزئى بر قاچ پارچه‌يى تصحيح ايدركن زحمت چكدم. فقط او زحمت، بڭا طاتلى گلييوردى. هم عينِ رحمت اولدى. بنى ده او معصوم و مباركلرڭ قافله‌سنه داخل ايده‌رك، بنم خطّمه بگزه‌دكلرى ايچون، كندم او پارچه‌لرى يازمشم گبى تام صاحب اولدم. أگر بن يازسه ايدم، عينًا اونلر گبى اولوردى.