(قسطمونيده‌كى قارداشلريمزه خطابًا يازيلان بر حقيقتدر. بلكه سزه ده فائده‌سى اولور دييه گوندردم.)
    رسالۀِ النور كندى صادق و ثباتكار شاكردلرينه قزانديرديغى چوق بيوك كار و قزانج و پك چوق قيمتدار نتيجه‌يه مقابل فيآت اولارق، او شاكردلردن تام و خالص بر صداقت و دائمى و صارصيلماز بر ثبات ايستر. أوت رسالۀِ النور اون بش سنه‌ده قزانيلان قوّتلى ايمانِ تحقيقى‌يى، اون بش هفته‌ده و بعضلره اون بش گونده قزانديرديغنه، يگرمى سنه‌ده يگرمى بيڭ ذات تجربه‌لريله شهادت ايدرلر.
    هم إشتراكِ أعمالِِ اُخرويه دستوريله، هر بر شاكردينه، هر بر گونده بيڭلر خالص لسانلر ايله ايديلن مقبول دعالرى و بيڭلر أهلِ صلاحتڭ ايشلدكلرى أعمالِِ صالحه‌نڭ مِثل ثوابلرينى قزانديروب، هر بر حقيقى، صادق و ثباتكار شاكردينى عملجه بيڭلر آدم حكمنه گتيرديگنى؛ كرامتكارانه و تقديركارانه إمامِ علينڭ (رَضِىَ اﷲُ عَنْهُ) اوچ إخبارى و كرامتِ غيبيۀِ غوثِ أعظمده‌كى (ق‌س) تحسينكارانه و تشويقكارانه بشارتى و قرآنِ معجز البيانڭ قوّتلى إشارتيله، او خالص شاكردلر أهلِ سعادت و أصحابِ جنّت اولاجقلرينه مژده‌سى پك قطعى إثبات ايدرلر. ألبته بويله بر قزانج، اويله بر فيآت ايستر.
    مادام حقيقت بودر. رسالۀِ النور دائره‌سنڭ ياقيننده بولنان أهلِ علم و أهلِ طريقت و صوفى‌مشرب ذاتلر، اونڭ جرياننه گيرمك و علم و طريقتدن گلن أسكى سرمايه‌لريله اوڭا قوّت ويرمك و گنيشله‌مسنه چاليشمق و شاكردلرينى تشويق ايتمك و بر بوز پارچه‌سى اولان أنانيتنى، تام بر حوضى قزانمق ايچون، او دائره‌ده‌كى آبِ حيات حوضنه آتوب أريتمك گركدر و ألزمدر. يوقسه رسالۀِ النوره قارشى رقيبانه باشقه بر چيغير آچمق ايله هم او ضرر ايدر، هم بو مستقيم و متين جادّۀِ قرآنيه‌يه بيلميه‌رك ضرر ويرر؛ زندقه‌يه بر نوع يارديم اولور.
    صاقين، صاقين! دنيا جريانلرى، خصوصًا سياست جريانلرى و بِالخاصّه خارجه باقان جريانلر سزى تفرقه‌يه آتماسين. قارشيڭزده إتّحاد ايتمش ضلالت فرقه‌لرينه قارشى پريشان ايتمه‌سين! {اَلْحُبُّ فِى اﷲِ وَ الْبُغْضُ فِى اﷲِ} دستورِ رحمانى يرينه، العياذ بِاﷲ {اَلْحُبُّ فِى السِّيَاسَةِ وَ الْبُغْضُ لِلسِّيَاسَةِ} دستورِ شيطانى حكم ايدوب، مَلك گبى بر حقيقت قارداشنه عداوت و الخنّاس گبى بر سياست آرقداشنه محبّت و طرفدارلق ايله ظلمنه رضا گوستروب، جنايتنه معنًا شريك أيله‌مسين.