رسالۀِ النورڭ پوسته‌جيسى مبارك عبد اﷲ نه حالده اولديغنى صوراجقدم. حافظ علينڭ مكتوبنده، صورمادن جوابمى آلدم. اﷲ، ايكيسندن راضى اولسون. او مكتوبڭ آخرنده، ماضى و مستقبل و سماوات أهلنى دخى مسرور ايدن معصوملرڭ و مبارك اُمّى إختيارلرڭ هديۀِ معصومانه‌لرى بياننده‌كى فقره‌سى غايت گوزل دوشمش.
    نور إسكله‌سنڭ ناظرِ بى نظيرى صبرىِ بصيرت بصيرڭ خصوصى مكتوبنده يازديغى مبارك بر همشيره‌مڭ جوشن الكبيرى أزبر ايتمه‌سى؛ أسكيدن بَرى او همشيره، رسالۀِ النور طلبه‌لرى ايچنده بولنديغنه إستحقاقنى گوسترييور. اونڭ ناميله برابر دعاده نامى ذكر ايديلن و حضرتِ مولانا خالدڭ جبّه‌سنى تام محافظه ايدوب بزه يتيشديرن آسيه خانمڭ بردن لساننه گلن بر فقره سزه گوندريله‌جك.
    او قوزجه خطيبى، رسالۀِ النورله تام علاقه‌دارسه، صبرى بنم بدلمه اوڭا سلام ايتسين.
    بزه گلن معصوم و اُمّيلرڭ و استادلرينڭ رساله‌لرينى، يدى جلد اولارق گوزلجه تصنيف ايتدك. معصوملرڭ توافقلى گوزل پارچه‌لرى بر جلد و إختيارلرڭ گوزل پارچه‌لرى ايچنده قهرمان شكرينڭ معجزاتِ أحمديه گوزل نسخه‌سى ايچنده اولارق ايكنجى جلد. يدى جلدڭ هر برينڭ باشنده اوچنجى صحيفه‌ده گلن فقره، مدارِ عبرت اولارق يازيلمشدر. عمومه سلام.
    ”رسالۀِ النورڭ كوچك و معصوم شاكردلرينڭ أللى آلتمش طلبه‌سنڭ و قرق أللى اُمّى مبارك إختيارلرڭ و قيمتدار استادلرينڭ يازدقلرى توافقلى و شيرين نسخه‌لرى بزه گوندرمشلر. او پارچه‌لرى يدى جلد ايچنده جمع ايتدك.
    بو مبارك اُمّى إختيارلرڭ قرق سنه صوڭره رسالۀِ النور خاطرى ايچون هر ايشه ترجيحًا يازى‌يه باشلامالرى و معصوم چوجقلرڭ، رسالۀِ النوردن درس آلدقلرى و يازدقلرى رساله‌لرڭ بر قسميدر. اونلرڭ بو زمانده، بو جدّى چاليشمالرى گوسترييور كه، رسالۀِ النورده اويله معنوى ذوق و جاذبه‌دار بر نور وار كه، مكتبلرده چوجقلرى اوقومغه شوقله سَوق ايتمك ايچون ايجاد ايتدكلرى هر نوع أگلنجه و تشويقلره غلبه ايده‌جك بر لذّت، بر سُرور، بر شوق رسالۀِ النور ويرييور كه؛ چوجقلر و اُمّى إختيارلر بويله حركت ايدييورلر.