بِسْمِ اﷲِ الرَّحْمٰنِ الرَّحِيمِ
    چوق محترم استاديمز أفنديمز!
    بيڭ اوچ يوز يگرمى بر (١٣٢١) تاريخنده، معجزاتِ أحمديه عليه الصلاة والسلامى و كرامتِ غوثيه رساله‌لرينى عالمِ منامده گورمشدم. بونڭ حكمتنى شيمدى‌يه قدر آڭلايه‌مامشدم. گورديگم رؤيا عينًا شويله ايدى:
    تاريخِ مذكورده، جزيرة العربڭ نجد قطعه‌سنڭ بلادِ قسيمده، بر گيجه رؤيامده؛ اوچ گونشڭ طلوع ايتمش اولديغنى گوردم. يانمده طانيه‌مديغم بر ذاته صوردم: ”بو اوچ گونش ناصل اولور؟“ ديدم. يانمده‌كى ذات: ”بو گونشڭ بريسى حضرتِ پيغمبر عليه الصلاة والسلامڭ گونشى؛ ديگرى غوثِ گيلانى‌نڭ؛ اوچنجيسى ده، ديگر بر گونشدر.“ اوچنجى گونشڭ رسالۀِ النور اولديغنى شيمدى بيلدم.
اَﷲُ نُورُ السَّمٰوَاتِ وَاْلاَرْضِ مَثَلُ نُورِهِ كَمِشْكٰوةٍ فِيهَا مِصْبَاحٌ اَلْمِصْبَاحُ فِى زُجَاجَةٍ اَلزُّجَاجَةُ كَاَنَّهَا كَوْكَبٌ دُرِّىٌّ يُوقَدُ مِنْ شَجَرَةٍ مُبَارَكَةٍ زَيْتُونَةٍ لاَ شَرْقِيَّةٍ وَلاَ غَرْبِيَّةٍ يَكَادُ زَيْتُهَا يُضِيءُ                وَلَوْ لَمْ تَمْسَسْهُ نَارٌ نُورٌ عَلَى نُورٍ يَهْدِى اﷲُ لِنُورِهِ مَنْ يَشَاءُ
آيتِ قرآنيه، او رؤيا حقيقتنه إشارت ايتمش. بو نورانى رؤيا، مذكور آيتِ نورڭ اون إشارتله، اون پارمق ايله گوسترديگى حقيقتى، عينًا گوسترييور؛ اوتوز سكز سنه أوّل خبر ويرييور. أوت اوچ نورِ أعظم اولان گونشلرڭ (اَﷲُ أَعْلَمُ) تعبيرى شو اولمق گركدر:
    گونشلرڭ برنجيسى: بو عصرده رسالۀِ النوردر. و أڭ پارلاق بر نورى ده، معجزاتِ أحمديه (عليه الصلاة والسلام) نامنده‌كى رسالۀِ خارقه‌در.
    ايكنجيسى: حضرتِ عيسى‌نڭ (ع‌س) دينِ حقيقيسندن چيقان نورِ سماوى گونشيدر.
    اوچنجيسى: طريقتلر روحنده و تصوّف منبعندن چيقه‌جق بر گونشدر كه؛ شيمدى شيخِ گيلانى تمثاليله او معنا گوستريلمش. رسالۀِ النوره إشارت ايدن اوتوز اوچ آيتِ قرآنيه‌‌نڭ أڭ برنجى آيتى اولان آيت النور اون وجهله رسالۀِ النوره إشارت ايتديگى برنجى شعاع رساله‌سنده گوزمله گوردم، ايسته‌ين گوره‌بيلير.
سزى نفسندن زياده سَون عاجز شاكرديڭز
بيڭباشى محيى الدين