خليل إبراهيمڭ مكتوبى، بلكه هر مكتوبى هم اونڭ، هم اينجه محمدڭ نامنه قبول ايدييورم. ايكيسنه، خسروله رشدى گبى، بر روح ايكى جسد نظريله باقييورم. جنابِ حق اونلرى موفّق ايتسين و أمثالنى اورالرده چوغالتسين. و او مكتوبده، رسالۀِ النورڭ طلبه‌لرندن حافظ محمد أمين و مصطفى چاوش ايله برابر، سعرْدلى أحمد و صلاح الدين و عزّ الدّين گبى ذاتلر ده رسالۀِ النورله علاقه‌دار اولدقلرينى بيلديرييور. بز ده اونلره برر برر هم سلام، هم اونلرى ده رسالۀِ النور طلبه‌لرى ايچنده دعاده تشريك ايده‌جگز.
    حافظ علينڭ مكتوبنده، ألنه گچن مكتوبمزى گوزلجه تقدير و خلاصه ايتمش. ”رسالۀِ النور سعادتِ أبديه دكّانى و باقى ألماسلرى صاتديغندن؛ فانى، قيرىق جام پارچه‌لرى اوندن ايسته‌نيلمه‌ملى“ تعبيرى چوق گوزل دوشمش.
    هم إسپارطه، هم مغنيساده‌كى بتون قارداشلريمزه برر برر سلام و دعا ايدييورز و دعالرينى ايسته‌يورز. حپسخانه‌ده، رسالۀِ النورڭ صوڭ كاتبى قهرمان شفيق عجبا صاغ ميدر؟ نره‌ده‌در؟ مراق ايدييورم. خليل إبراهيمدن صوريڭز.
* * *
    عزيز، صدّيق قارداشلرم!
    شهورِ محرّمه‌دن صوڭره، خصوصًا بهاره ياقين، حياتِ دنيويه غفلتى بر درجه فتور ويرمكله برابر؛ بعض صارصينتيلر و خسته‌لقلر و عسكرلگه گيتمه جهتنده رسالۀِ النورڭ خدمتنه بر درجه ضعف گلمش دييه أنديشه ايدييوردم. جنابِ حقّه شكر كه؛ مكتوبلريڭز و عاطف حسنڭ گلمسيله او أنديشه زائل اولدى. او مكتوبڭزده، چوق أهمّيتلى بر حادثۀِ نوريه‌دن بحث وار كه، حزب الأكبر القرآنى طبع ايتمك تشبّثيدر.