أوت او حزب الأكبرده‌كى آيات؛ بتون رسائلِ نوريه‌نڭ روحى، أساسى، معدنى، استادى و گونشيدر. اونڭ طبعندن صوڭره ممكنسه، رسالۀِ النورڭ حزب الأكبرى نامنده عربىّ العباره و ايكى آيت الكبرا و مناجاتڭ خلاصه‌سى اولان رساله‌ىى دخى طبع ايتمك لازمدر. فقط ألڭزده‌كى نسخه، بنم نسخه‌م گبى مكمّل دگل. بز بوراده يازوب، ايسترسه‌ڭز سزه گوندره‌لم. ايسترسه‌ڭز، إستانبولده مطبعه‌ده اولان وكيلڭزه گوندره‌لم. آدرسنى بيلديريڭز.
    قارداشمز حسن عاطف، حقيقةً رسالۀِ النورڭ خدمتنه پك چوق لايق و مستعددر. مستثنا خطّيله برابر إخلاصى، إرتباطى، علاقه‌دارلغى، جدّيتى، صداقتى دخى مكمّلدر. جنابِ حق اونڭ أمثالنى چوغالتسين. بو قارداشمزى يگرمى مكتوب يرنده، سزه جانلى بر مكتوب اولارق گوندردك.
    حافظ علينڭ بوراده‌كى قارداشلرينه چوق يوكسك، چوق تأثيرلى يازديغى مكتوبه قارشى باشده فيضى، أمين اولارق عموم نامنه فيضى دييور كه: ”بز بو مملكت طلبه‌لرى، إسپارطه قهرمانلرينڭ كوچك قارداشلرى، بلكه اونلرڭ طلبه‌لرى‌يز. درسى، خدمتى و جدّيتى اونلردن آلييورز. هر بريسى، بزم ايچون برر استاددر. اونلرڭ أللرندن اوپر، عرضِ حرمت ايدرز. جنابِ حق، او قهرمانلردن أبدًا راضى اولسون، آمين.“ دييورلر.
    رسالۀِ النورڭ إسكله ناظرى صبرينڭ برنجى طلبه‌سى و رسالۀِ النورڭ أهمّيتلى كوچك بر طلبه‌سنڭ كوچوجك مكتوبنده‌كى گوزل يازى بزى مسرور ايتدى. جنابِ حق اونى و اونڭ گبى رسالۀِ النوره چاليشان معصوملره توفيق و سلامت و سعادت إحسان أيله‌سين، آمين.
    حافظ مصطفى‌نڭ بزجه پك چوق أهمّيتلى اولان مكتوبى، چوقدن بَرى بكله‌ديگم بر حقيقتى گوستردى كه؛ رسالۀِ النور دائره‌سنده‌كى شاكردلر، إستشاره صورتنده، طبع ايتمك گبى چوق أهمّيتلى ايشلرى گورمه‌يه باشلامالريدر.