عزيز، صدّيق قارداشلرم!
    بو يڭى حادثۀِ تعرّضيه‌دن متأثّر اولمايڭز. چونكه مكرّر تجربه‌لرله، رسالۀِ النور عنايت آلتنده‌در. هيچ بر طائفه، شيمدى‌يه قدر بويله بر أهمّيتلى خدمتده بزلر قدر آز مشقّتله قورتولان اولمامش.
    هم گچن رمضانده‌كى خسته‌لغم و أسكيشهرده‌كى مصيبتمز گبى چوق واقعه‌لرله ظاهرى صيقنتيلى مشقّتلى حالات آلتنده رسالۀِ النورڭ فائده‌سنه اولارق إنكشافاتى و داها تأثيرلى فتوحاتى گورولمش. إن شاء اﷲ، بو صيقنتيلى حادثه دخى، منافقلرڭ عكسِ مقصوديله، رسالۀِ النورڭ فتوحاتنى باشقه بر مجراده تسهيله وسيله اولور.
    بشنجى شعاع، يگرمى بش سنه أوّل مسائلى يازيلان، يالڭز بر ايكى صحيفه تطبيقات علاوه ايديلوب شعاعلره گيرن بشنجى شعاع أللرينه گچمه‌سى أهمّيتليدر. فقط بونده ده بر حكمت وار. بلكه اونلره كندى مسلكلرينى بيلديرمك و جهنّمه گيده‌نڭ ماهيتنى بيلمك ايچون، فوق العاده إقتدار خارجنده بر قضاءِ إلٰهىدر، دييه جنابِ حقّڭ حكمتنه و عنايتنه و حفظنه إعتماد ايدوب، مراق ايتمه‌يڭز.
    هم سز، هم اونلر بيلسينلر كه صدقه بلاىى دفع ايتديگى گبى؛ رسالۀِ النور آناطوليدن، خصوصًا إسپارطه، قسطمونيدن آفاتِ سماويه و أرضيه‌نڭ دفع و رفعنه وسيله‌در. أوت صبرينڭ {يَا اَرْضُ ابْلَعِى...وَاسْتَوَتْ عَلَى الْجُودِىِّ} آيتندن إستخراج ايتديگى معنا، حقدر و مطابقدر.