عزيز، صدّيق، صادق، خالص و مخلص قارداشلرم!
    درت بش قارداشلريمه عائد برر قيصه‌جق قونوشاجغم:
    برنجيسى: مدرسۀِ نوريه‌نڭ مرشدى، مؤسِّسى و مدبّرى حاجى حافظ قارداشمزڭ بو دفعه اوچنجى اولارق بر تبرّكنى گوردك. تا بارلاده ايكن، طاتلى لقمه‌لرڭ كرامتلى، عجيب بركتى و إسپارطه‌ده إقتصاد رساله‌سنى طاتليلاشديران ايكى بچق اوقّه بالڭ خارقه بر حادثه‌يه سببيت ويرمه‌سى (حاشيه)، بو اوچنجى دفعه ده، بيڭ مبارك و معصوم خاطرلرينى و إلتفاتلرينى تمثيل ايدن و پارچه‌لانميان بر هديه‌يى گوندرمش. آلتمش سنه‌لك بر قاعدۀِ حياتيه‌مى، او بيڭ خاطرڭ خاطرى ايچون، او قاعده‌مڭ خاطرينى قيردم.
    ايكنجيسى: عاطف حسنڭ حقيقةً فوق العاده يازديغى توافقلى معجزاتِ قرآنيه‌يى، او گيتدكدن صوڭره تماشا ايتدم. ألمدن گلسه ايدى، هر بر ياپراغنه مقابل بر ليرا ويره‌جكدم. إن شاء اﷲ او نسخه ايله بيڭلر آدم إستفاده ايدوب، اونڭ حياتِ باقيه‌سنه بر چشمه حكمنده واردات ويره‌جك. خسروڭ و قهرمان طاهرينڭ بر اوچنجيسى اولويور.
    اوچنجيسى: رسالۀِ النورڭ أسكى و أهمّيتلى و چاليشقان بر شاكردى اولان كاتب عثمانڭ صادق و حكمتلى رؤياسى و مطابق تعبيرى اونلرى مفرّح ايتديگى گبى، بزلرى ده مسرور أيلدى. و او مكتوبيله، مراق ايتديگم شيلرى؛ و خسرو و رشدى، حافظ على، زهدى بدوى، نورى و نور فابريقه‌سى صاحبى، طاهرلر، مباركلر هيئتى، مدرسۀِ نوريه و اُمّى إختيارلر و معصوم چوجقلر، عموملرينڭ سلاملرينى يازييور. بز ده اونلره برر برر سلام ايدييورز. موفّقيتلرينه و سلامتلرينه دعا ايدييورز.
    بو حواليده دخى، بلكه چوق يرلر ده سزڭ فعاليتڭزدن شوقه گلوب، رسالۀِ النور زياده توسّع ايتديگندن؛ أهلِ دنياىى دوشونديرييور، نظرِ دقّتى جلب ايتديرييور. بعض اوفاق تفك ايليشمك ده اوندن ايلرى گلييور. إحتياط هر وقت اولديغى گبى ينه لازمدر. حضرتِ إمامِ على رَضِىَ اﷲُ عَنْهُ ايكى دفعه {سِرًّا تَنَوَّرَتْ} ديمسى، رسالۀِ النور پرده آلتنده تنوّر و تنوير ايدر دييه إشارت ايدييور. ممكن اولديغى قدر گچيجى روزگارلره أهمّيت ويرمه‌يڭز، باقمه‌يڭز. ذاتًا مابينڭزده صميمى تساند و مشورتِ شرعيه، سزى اويله شيلردن محافظه ايدر. ايچڭزده‌كى شخصِ معنوينڭ فكرينى، او مشورتله بيلديرر.
قارداشڭز و سزڭله دنياده، برزخده، آخرتده متشكّرانه إفتخار ايدن و ايده‌جك، خدمتِ قرآنيه‌ده آرقداشڭز
سعيد النورسى
* * *