بِاسْمِهِ سُبْحَانَهُ  ❊  وَاِنْ مِنْ شَيْءٍ اِلاَّ يُسَبِّحُ بِحَمْدِهِ
اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ
    عزيز، صدّيق قارداشلرم و خدمتِ قرآنيه‌ده قهرمان آرقداشلرم!
    بوندن أوّل اوچ مكتوب، أمانتى آلدقدن صوڭره گوندرمشدم. بو دفعه‌كى حافظ علينڭ مكتوبنده اونلردن بحث ايتمه‌مش، مراق ايتدم. نور فابريقه‌سى صاحبى حافظ علينڭ خسته‌لغى بنى متأثّر ايتدى، بزى دعايه سَوق ايتدى. جنابِ حق قوّت و شفا إحسان أيله‌سين، آمين.
    حافظ علينڭ مكتوبيله رسالۀِ النورڭ أهمّيتلى ركنلرندن اولان خليل إبراهيمڭ سيستمنده أحمد فيضى‌نڭ مكتوبلرى، شخصمه عائد حدّمدن يوز درجه فضله حسنِ ظنلرى بر طرفده قالسه (اوندن قطعِ نظر) او حواليده رسالۀِ النورڭ شخصِ معنويسنه قارشى، خليل إبراهيمله أحمد فيضى‌نڭ صارصيلماز، غايت قوّتلى إرتباطلرينى گوسترديگندن، بزى جدًّا مسرور أيلدى.
    أوت اونلرڭ او شدّتلى علاقه‌دارلقلرى، او حواليده رسالۀِ النورى يرلشديرييور، إدامه ايتديرييور. او ايكيسنڭ مكتوبلرى، صورتِ ظاهريه‌ده بنم شخصمه عطفِ أهمّيت ايتمه‌لرى گرچه موافق دگل، مبالغه‌در. فقط او ياڭليش صورتڭ آلتنده‌كى حقيقت، رسالۀِ النور شاكردلرينڭ صميمى تساندلرندن سوزولن بر شخصِ معنوى‌يه و رسالۀِ النورڭ قرآندن گلن حقيقتنه قارشى تام مطابق و حق اولارق صرف ايديله‌جك او مكتوبلرده‌كى تعبيرات، بنم گبى بر جزئى فرده قارشى صرف ايديلمش. بنم حدّمدن بيڭ درجه فضله اولمقله برابر، او شخصِ معنوى نامنه و رسالۀِ النورڭ حقيقتى حسابنه و او أهمّيتلى و چوق محتاج مملكتده فوق العاده بر علاقه و فعاليته علامت اولمق جهتيله قبول ايتدم.
    أحمد فيضى‌نڭ ده، إن شاء اﷲ قسطمونى فيضى‌سى گبى، بتون قوّتيله رسالۀِ النوره چاليشه‌جق بر عزم و قرار صورتنده مكتوبنى تلقّى ايدييورز. فقط محويتى و تواضعى پك فضله و ايستدكلرى ده پك فضله و مكتوبنده‌كى دعالرى ده گوزل اولديغندن، دائمى دعامزده بورانڭ فيضيسيله اوموز اوموزه گيردى