بوگونلرده ايكى خاطره‌دن ايكى إخطار:
    برنجيسى: بو شهرده رسالۀِ النوره إنتساب ايدن إختياره خانملر ثبات ايتدكلرينى و باشقه‌لر گبى صارصيلمادقلرينى دوشوندم. بردن بو حديثِ شريف إخطار ايديلدى: {عَلَيْكُمْ بِدِينِ الْعَجَائِزِ} يعنى: ”آخر زمانده، إختياره قادينلرڭ صميمى دينلرينه و قوّتلى إعتقادلرينه تابع اولڭز.“ أوت إختياره قادينلر فطرةً ضعيفه و حسّاسه و شفقتلى اولمالرندن، هركسدن زياده دينده‌كى تسلّى و نوره محتاج اولديغى گبى؛ هركسدن زياده فطرتلرنده فداكارانه شفقت جهتيله، دينده بولديغى نهايتسز شفقت‌پرورانه بر نورِ تسلّى و إلتفاتِ مرحمتِ رحمٰن و نقطۀِ إستناد و نقطۀِ إستمداده إحتياجى وار. تام ثبات ايتمك، فطرتلرينڭ مقتضاسيدر. اونڭ ايچون، بو زمانده او حاجاتى تام يرينه گتيرن رسالۀِ النور، هر شيدن زياده اونلرڭ روحلرينه خوش گلييور و قلبلرينه ياپيشييور.
    ايكنجيسى: بوگونلرده بنم يانمه متعدّد آيرى آيرى ذاتلر گلدىلر. بن اونلرى آخرت ايچون ظنّ ايتدم. حالبوكه يا تجارت ويا ايشلرنده بر كساد و موفّقيتسزلك اولديغندن، بزه و رسالۀِ النوره، موفّقيت ايچون و ضرردن قورتولمق نيتيله مراجعت ايدوب، دعا و إستشاره ايستدكلرينى آڭلادم.
    بن بونلره نه ايده‌يم و نه دييه‌يم؟ دييه تخطّر ايتدم. بردن إخطار ايديلدى: ”نه سن ديوانه اول و نه ده اونلرى ديوانه‌لكده بيراقوب ديوانه‌جه قونوشمه. چونكه ييلانلر زهرينه قارشى ترياق تداركيله و اونلرى قاچيرماسيله مشغول و وظيفه‌دار بر تك آدم، ييلانلر ايچنده طوران و سينكلرڭ ايصيرماسنه معروض اولان و سينكلرى قاچيرمق ايچون چوق يارديمجيلرى بولنان ديگر بر آدمه، ييلانلرڭ ايصيرماسنى بيراقوب اوڭا، سينكلر ايصيرمامسنه يارديم ايچون قوشان ديوانه‌در. و اونى چاغيران دخى ديوانه‌در. او صحبت دخى ديوانه‌جه بر قونوشمقدر.“ أوت، حدسز حياتِ اُخرويه‌يه نسبةً موقّت و فانى قيصه‌جق حياتِ دنيويه‌نڭ ضررلرى، سينكلرڭ ايصيرماسى گبيدر. حياتِ أبديه‌نڭ ضررلرى، اوڭا نسبةً ييلانلرڭ ايصيرماسيدر.