رسالۀِ النورڭ منسوبلرى، شعور و إختيارلرى خارجنده بربريله مناسبتدار، بربرينڭ حادثه‌لريله علاقه‌دار اولديغنه بر دليل ده بوگونلرده اولدى. شويله كه:
    اوراده‌كى حادثه‌نڭ وقوعندن بوگونه قدر، بوراده‌كى مختلف طبقه‌لرده‌كى طلبه‌لرڭ وضعيتلرى، أهمّيتلى بر حادثه يوزندن دگيشمش گبى چكينمك و منافقلرڭ نظرينى كنديلرينه و بزلره جلب ايتمه‌مك ايچون بر توقّف دوره‌سى گچدى. بن ده حيرت ايدييوردم. هم نظيف گبى بر قاچ ذاتڭ رؤيالرينڭ تعبيرلرى، سزڭ حادثه‌ڭز اولديغنى آڭلادق.
    عموم قارداشلريمزه برر برر و بِالخاصّه مصيبتزده‌لره سلام و دعا ايدييورز. جنابِ حق اونلرى چابوق قورتاروب وظيفه‌لرينڭ باشنه گوندرسين، آمين.
* * *
بِاسْمِهِ سُبْحَانَهُ  ❊  وَاِنْ مِنْ شَيْءٍ اِلاَّ يُسَبِّحُ بِحَمْدِهِ
 اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ بِعَدَدِ كَلِمَاتِ الْقُرْآنِ وَحُرُوفَاتِهَا
عزيز، صدّيق، مبارك قارداشلرم و خدمتِ قرآنيه‌ده قوّتلى، فعّال، ثباتكار آرقداشلرم!
    بوگونلرده بنمله آلتى آدم، باشده مرانغوز أحمد، آخرنده بن، معنوى إخطاره بناءً برر مسئله‌يه مدار اولمشز:
    برنجيسى: فعّال، جدًّا چاليشقان، رسالۀِ النور و مدرسۀِ نوريه طلبه‌لرندن مرانغوز أحمدڭ مكتوبنده، أشرف نامنده اون ياشنده بر معصوم چوجغڭ؛ كوينى، مالنى ترك ايدوب، ايكى گون مسافه‌دن گلوب، هيچ يازى يازماديغى حالده، اون گون ظرفنده رسالۀِ النورى يازمغه موفّق اولماسى، رسالۀِ النورڭ بر كرامتى اولديغى گبى، مدرسۀِ نوريه‌نڭ ده خارقه بر چيچگيدر دينليور.
    أوت بز ده ديرز كه: مادّى بر قيشده گوزل چيچكلرڭ آچيلمه‌سى، بر خارقۀِ قدرت اولديغى گبى؛ بو عصرڭ معنوى و دهشتلى قيشنده، صاوه قريه‌سنڭ، يعنى صاوه شجره‌سى بيڭ گوزل چيچكلر و جنّت ميوه‌لرى آچماسى و إسپارطه مملكت باغچه‌سى، بيڭلر گُلِ محمّدى (ع‌ص‌م) چيچكلرى آچماسى (حاشيه)؛ ألبته خارقه بر معجزۀِ رحمت و بو مملكته خارقه بر كرامتِ عنايتِ ربّانيه و رسالۀِ النور طلبه‌لرينه خارق العاده بر إكرامِ إلٰهىدر دييه إعتقاد ايدوب، جنابِ حقّه حدسز شكر ايدرز.