بشنجيسى: رسالۀِ النورڭ بر طلبه‌سى، رسالۀِ النوره چاليشه‌مديغنڭ بر سببى، دردِ معيشتڭ زياده‌لشمه‌سى اولديغنى سويله‌دى. بز ده اوڭا ديدك: رسالۀِ النوره چاليشماديغڭ ايچون دردِ معيشت سڭا شدّتلندى. چونكه بو حواليده هر طلبه إعتراف ايدييور و بن ده ايدييورم كه: رسالۀِ النوره چاليشدقجه، ياشامقده قولايلق و قلبده فرحلق و معيشتده سهولت گورويورز.
    آلتنجيسى: بو بيچاره سعيددر. هركسڭ آرزو ايتديگى و ايستديگى و فرحله قبول ايتديگى، شخصنه قارشى حرمت و محبّت و صحبت، (فقط رسالۀِ النوره تعلّق ايدن نقطه‌لر خارجنده) بڭا آغير گلييور، بنى صيقييور، متأثّر ايدييور. تخمين ايدييورم كه، رسالۀِ النورڭ يوكسك خاصيتلرى و شاكردلرينڭ شخصِ معنويسنڭ پك بيوك مزيتلرى، شخصم گبى مسلكِ عجزده فضله ايلرى گيدن بر عاجز و بيچاره‌نڭ ضعيف اوموزينه او طاغ گبى معنالر يوكلنسه آلتنده أزيلير، صيقيلير دييه آڭلادم. بو آخركى ايكى مسئله‌ده پك قيصه كسمگه كاغد مجبور ايتدى. نور، گل و لطفينڭ قهرمان وارثلرى، مباركلر يوكسك هيئتى و مدرسۀِ نوريه و معصوملر و اُمّى إختيارلرڭ هر بريسنه بيڭلر سلام ايدييورز.
دعاڭزه محتاج، سزه مشتاق قارداشڭز
سعيد النورسى
* * *