قسطمونى لاحقه‌سى | عزيز، صدّيق، مبارك قارداشلرم | 151
(4-194)

 سزلر أى أهلِ سياست و حكومت! أوهام ايدوب بزلرله اوغراشمايڭز. بِالعكس تسهيلات گوسترمڭز لازم. چونكه خدمتمز، أمنيت و حرمت و مرحمتى تأسيس ايله هم آسايشى، هم إنضباطى، هم حياتِ إجتماعيه‌يى آنارشيلكدن قورتارمغه چاليشوب، سزڭ حقيقى وظيفه‌ڭزڭ تمل طاشلرينى تثبيت ايدييور، تقويه و تأييد ايدييور.“
    سابعًا: حافظ علينڭ مكتوبنده بعضلره خطابًا يازديغمز بر مكتوب ايله و حادثۀِ حاضره دائر خفيف گچه‌جگنه عائد صوڭ مكتوب، بوگوندن بر هفته أوّل پوسته‌يه ويرلمش. حافظ على، يولده‌كى او ايكى مكتوبى اوقومش گبى مكتوبنى يازمسى، صداقتنڭ بر لمعۀِ كرامتى اولديغى گبى؛ عين گونده، (هيچ وقوع بولمه‌مش) يانمه أهمّيتلى بيوك بر مأمورِ سياسى گلمسنى نظيفڭ آرقداشلرندن كور اوغلى أحمد رؤياده عينًا گوروب، او مأموردن اوچ ساعت أوّل رؤيايى بزه حكايه ايدوب تعبير ايستدى؛ تعبيرى، تأويلسز چيقدى.
    عموم قارداشلريمزه برر برر، خصوصًا مصيبتزده‌لره سلام و دعا ايدرز.
* * *
    عزيز، صدّيق، مبارك قارداشلرم و خدمتِ قرآنيه و ايمانيه‌ده ثباتكار، صارصيلماز، ييلماز آرقداشلرم و بو مسافرخانۀِ دنياده شفقتكار و فداكار و وفادار يولداشلرم!
    بو دفعه نور فابريقه‌سنڭ صاحبيله و تام بر معاونى و تام بر خسرو اولان قهرمان طاهرڭ بشارتلى مكتوبلرى و مدرسۀِ نوريه‌نڭ قهرمانلرندن مرانغوز أحمدڭ ايكنجى رؤياسى و اوچنجى رؤيانڭ آخرنده، معلوم مصيبتڭ عقيبنده صارصيلميان فعّال حافظ محمدڭ چوجقلره ختم دعاسنى ياپمسى و رسالۀِ النورى اوقوتماسى، اوستومزدن طاغ گبى معنوى آغيرلقلرى قالديرديلر. جنابِ حق سزلرى و اونلرى آفاتِ معنويه و مادّيه‌دن محافظه ايتسين، آمين.
    مرانغوز أحمدڭ ايكنجى رؤياسى، پيغمبرمز عليه الصلاة والسلام ايله علاقه‌دارلق و سرورلى اولديغى جهتندن رؤياىِ صادقه اولديغنه، او مدرسۀِ نوريه‌نڭ جوارلرنده‌كى قارداشلرڭ و همشيره‌لرڭ مادّى خدمتلرى جانلى و روحلى بر صورت آلوب، پيغمبر عليه الصلاة والسلامڭ سنّتِ سنيه‌سنڭ إحياسنه مدار اولاجغنه إشارت ويرديگى مناسبتيله، مكتوبڭزى آلمه‌دن ايكى گون أوّل گورديگم بر رؤيايى بيان ايدييورم. شويله كه:
 

سس يوق

قسطمونى لاحقه‌سى