هم أسكى سعيدڭ علمِ منطق نقطه‌سنده بر شاه أثر حكمنده بولنان غيرِ مطبوع تعليقاتدن سوزولن إعجازلى بر ايجازِ خارقه‌ده، مدقّق علمالرى حيرت و تحسينله دقّته سَوق ايدن، مطبوع ”قيزيل ايجاز“ نامنده‌كى رسالۀِ منطقيه رسالۀِ النورله باغلانماسنه و شاكردلرينڭ عالملر قسمنڭ نظرينه گوسترمك لايق گوردم. فقط چوق دريندر. بوگونلرده فيضى‌يه بر پارچه درس ويردم. بلكه بر زمان فيضى كنديسى، باشقه‌سنڭ ده آڭلاماسى ايچون درسنى توركجه قلمه آلاجق.
* * *
    عزيز، صدّيق قارداشلرم، ثباتكار و حقيقى وارثلرم!
    بوگونلرده رسالۀِ النور طلبه‌لرى حسابنه غايت أهمّيتلى، أنديشه‌لى بر سؤالِ معنوى قلبمه إخطار ايديلدى. صوڭره آڭلادم كه؛ أكثر رسالۀِ النور طلبه‌لرينڭ لسانِ حاللرى بو سؤالى صورويور و صوره‌جقلر. بردن بر جواب خاطره گلدى، فيضى‌يه سويله‌دم. ديدى: ”هيچ اولمازسه إجمالاً قيد ايديلسين.“
    أنديشه‌لى سؤال: بو آخر زمان فتنه‌سنده، آجلق أهمّيتلى بر رول اويناياجق. اونڭله أهلِ ضلالت، بيچاره آج أهلِ ايمانى دردِ معيشت ايچنده بوغديروب، حسّياتِ دينيه‌يى يا اونوتديروب، يا ايكنجى، اوچنجى درجه‌ده براقمغه چاليشه‌جق دييه، روايتلردن آڭلاشيلييور. عجبا، هر شيده حتّى قهر عذابنده أهلِ ايمان و معصوملر ايچون بر وجهِ رحمت و قدرِ إلٰهى جهتنده عدالت اولديغى، بونده نه طرزده اولور؟ و أهلِ ايمان، خصوصًا رسالۀِ النور طلبه‌لرى بو مصيبته قارشى ايمان و آخرت حسابنه نه جهتله إستفاده ايدوب، ناصل طاوراناجقلر و مقاومت ايده‌جكلر؟
    الجواب: شو مصيبتڭ أڭ أهمّيتلى سببى؛ كفرانِ نعمت و شكرسزلك و نعمتِ إلٰهيه‌نڭ قيمتنى تقدير ايتمه‌مكلكدن گلن بر عصيان اولديغندن، عادلِ حكيم نعمتنڭ خصوصًا غدا قسمنڭ، خصوصًا حيات نقطه‌سنده أڭ بيوك نعمت اولان أكمگڭ حقيقى لذّتنى و چوق أهمّيتلى قيمتنى و نعمتيت نقطه‌سنده فوق العاده درجه‌سنى گوسترمك ايله، حقيقى شكره سَوق ايتمك حكمتيله، رمضان گبى رياضتِ دينيه‌يه رعايت ايتمه‌ين شكرسز إنسانلره بو مصيبتى وىروب، عين حكمت ايچون عدالت ايتمش.