أهلِ ايمان، أهلِ حقيقت، خصوصًا رسالۀِ النور طلبه‌لرينڭ وظيفه‌سى؛ بو مصيبتلى آجلغى، رمضان رياضتِ دينيه‌‌سنڭ طرزنده‌كى آجلق گبى وسيلۀِ إلتجا و ندامت و تسليميت ياپمغه چاليشمقدر. و ضرورت بهانه‌سيله، ديلنجيلگه و خيرسزلغه و آنارشيلگه يول آچماسنه ميدان ويرمه‌مكدر. و آج فقيرلره آجيميان بر قسم زنگين و بعض أهلِ معاش دخى رسالۀِ النورى ديڭله‌يوب، بو مجبورى آجلق حسّيله آجلره مرحمته گلوب زكاتله يارديملرينه قوشمقدر. و نفسنى گوزل ييمكلرله شيمارطان، سركش ايدن و هوساتِ رذيله و طغيانلره سَوق ايدوب سرخوش ايدن گنجلر دخى، رسالۀِ النورڭ إرشاديله، بو حادثه‌دن مردانه إستفاده ايده‌رك، فحشيات و گناهلردن أللرينى بر درجه چكديگى و نفسلرينڭ ذوقلرينى و پيسلكلره قارشى غليانلرينى قيرديغى وسيله‌سيله طاعته و خيراته گيروب، او حادثه‌يى كندى عليهلرندن چيقاروب، لهلرنده إستعمال ايتمكدر. و أهلِ عبادت و صلاحت دخى، أكثر إنسانلرڭ آج قالديغى بو زمانده و چوق قاريشمش و حرام و حلال فرق ايديلميه‌جك بر طرزه گلمش و شبهه‌لى مال حكمنده و معنًا مشترك اولان أرزاقِ عموميه‌دن حلال اولمق ايچون مقدارِ ضرورت درجه‌سنه قناعت ايدييورم دييه، بو مجبورى بلايه بر رياضتِ شرعيه نظريله باقمقدر. قدرِ إلٰهيه‌يه قارشى شكوا ايله دگل، رضا ايله قارشيلامقدر.
    عموم قارداشلريمه خصوصًا مصيبتزده‌لره چوق سلام و سلامتلرينه دعا ايدييورم.
    صبرى قارداشم! سنى توكيل ايدوب سلام گوندرنلره، بن ده سنى توكيل ايدييورم. اونلره برر برر سلام ايدييورم. سنڭ بو دفعه‌كى مكتوبڭ گرچه گج گلدى، فقط بر قاچ نقطه‌ده بنى چوق ممنون ايتدى. صبرينڭ ألماس و چليك گبى متانتنى و إصابتِ فكرينى گوستردى. مادام حافظ على ايله سز، آتابگ يوليله ده مخابره ايتمه‌يى مناسب گورمشسڭز. آتابگده عبد اﷲ چاوشڭ ويا مناسب گورديگڭز بريسنڭ آدرسنى بيلديريڭز. عبد اﷲ چاوشڭ سزڭ نامڭزه ايستديگى اوننجى شعاع نامنده‌كى فهرسته‌نڭ ايكنجى جلدينى يازديردق و حزب الأكبرِ نوريه‌يى فيضى يازدى. ياقىنده إن شاء اﷲ گوندره‌جگز.
سعيد النورسى