برنجى، ايكنجى خلوصيلرڭ مشترك مكتوبلرى، بو ايكى ركنِ مهمّه‌نڭ غيرتلرى، صداقتلرى چليكدن داها متين اولديغى هر حادثه ايله گوستريلييور.
سعيد النورسى
* * *
    عزيز، صدّيق، ثباتكار قارداشلرم و حقيقى وارثلرم!
    بوگونلرده رسالۀِ النوره سوءِ قصد ايدنلرڭ و سزلره صيقنتى ويرنلرڭ حقلرنده، بڭا ويرديگى بر حدّت نتيجه‌سنده بددعايه تشبّث ايتدم. بردن إسپارطه‌يه قيامدم. قاچ دفعه‌در نيّت ايتدم، إسپارطه‌ده‌كى اييلرڭ يوزندن سوءِ قصدجيلر قورتولديلر. قيامدم، بددعا يرينه؛ ”يا رب! مادام إسپارطه رسالۀِ النورڭ بر مدرسة الزهراسيدر، سن اوراده‌كى فنا مأمورلرى دخى إصلاح أيله و حسنِ عاقبت وير“ دييه دعا أيلدم و ايدييورم.
    ثانيًا: بوگونلرده صلاح الدّينڭ إستانبولدن گتيرديگى حبّه، قطره، شَمَّه، حباب گبى عربى رساله‌لره باقدم. گوردم كه: يڭى سعيدڭ طوغريدن طوغرى‌يه حركاتِ قلبيه‌سنده مشاهده ايتديگى حقيقتلر، رسالۀِ النورڭ چكردكلرى حكمنده‌در. ذاتًا بونلر هم شعله و زهره، رسالۀِ النورڭ عربى پارچه‌لريدر. اونلر، طوغريدن طوغرى‌يه بنم نفسمڭ درسى اولديغى ايچون، عربى و قيصه عباره‌لرله إفاده ايديلمش، باشقه آدملر نظره آلينمامش.
    او زمان باشده شيخ الاسلام و دار الحكمت أعضالرى و إستانبولڭ بيوك عالملرى، تحسين و تقديرله قارشيلاديلر. بونلر يڭى سعيدڭ أثرلرى اولديغندن، رسالۀِ النورڭ أجزالريدرلر. أسكى سعيدڭ ايسه، عربى رساله‌لرندن يالڭز إشارات الإعجاز، رسالۀِ النورده أڭ مهم بر موقع آلمش.
    هم هر ايكى سعيدڭ إشتراكيله، بر تك رمضانده ايكى هلال اورته‌سنده تأليف ايديلن و كندى كندينه، إختيارم خارجنده بر درجه منظوم شكلنى آلان و إشارات الإعجاز قطعه‌سنده أللى آلتمش صحيفه بولنان توركجه اولارق لمعات نامنده‌كى رساله دخى رسالۀِ النوره گيره‌بيلير. مع التأسّف بر نسخه ألده ايده‌مه‌دم. هركسڭ خوشنه گيتديگى ايچون، مطبوع نسخه‌لرى قالمه‌مش.