خامسًا: بوگونلرده، او حادثه‌ده، رسالۀِ النورڭ بر درجه توقّفنه و دنيايه باقمغه و يگرمى سنه‌در قونوشماديغم آدملرله قونوشمغه و خدمتِ قرآنيه نقطه‌سنده ممنوع اولديغمز سياسته تماس ايتمگه مجبور اولاجغم دييه، أنديشه‌دن گلن شدّتلى بر تأثّردن، ظاهرًا گورولمز، معنًا تهلكه‌لى بر خسته‌لق بڭا تعرّض ايتدى. مستمر عادتمى بِتَمَامْ يرينه گتيره‌مديگمدن، ينه رمضان خسته‌لغى گبى، بن قارداشلرمدن، ينه معنوى معاونتلرينى چوق رجا ايدييورم. فقط مراق ايتمه‌يڭز، ياتاقده دگلم. يالڭز فضله يازيلان نسخه‌لرى تصحيح ايده‌مييورم.
    سادسًا: رسالۀِ النور بر جبهه‌ده توقّف ايتسه ده، باشقه جبهه‌لرده فتوحاتى او توقّفڭ يرينى طوتار. حتّى بو حادثه مناسبتيله بوراده بر درجه إحتياطه بناءً توقّفه نيّت ايدوب ترويج ايتديگمز حالده؛ بِالعكس إسپارطه توقّفنه قارشى، بورالرده إنكشافات ايله تظاهر ايتدى. {اَلْحَمْدُ ِﷲِ هٰذَا مِنْ فَضْلِ رَبِّى}
    أڭ زياده بزه نظارتله، بزمله و سياستله علاقه‌دار مهم بر مأمور يانمه گلدى. اوڭا ديدم كه:
          ”بو اون سكز سنه‌در سزلره مراجعت ايتمه‌دم و هيچ بر غزته اوقومدم؛ بو سكز آيدر، بر دفعه جهانده نه اولويور، دييه صورمادم؛ اوچ سنه‌در بورادن ايشيديلن راديويى ديڭله‌مدم؛ تا كه قدسى خدمتمزه معنوى ضرر گلمسين. بونڭ سببى شودر كه: ايمان خدمتى، ايمان حقائقى، بو كائناتده هر شيئڭ فوقنده‌در؛ هيچ بر شيئه تابع و آلَت اولاماز. فقط بو زمانده أهلِ غفلت و ضلالت و ديننى دنيايه صاتان و باقى ألماسلرى شيشه‌يه تبديل ايدن غافل إنسانلر نظرنده او خدمتِ ايمانيه‌يى خارجده‌كى قوّتلى جريانلره تابع ويا آلَت تلقّى ايتمك و يوكسك قيمتلرينى عمومڭ نظرنده تنزيل ايتمك أنديشه‌سيله، قرآنِ حكيمڭ خدمتى بزه قطعى بر صورتده سياستى ياساق ايتمش.