عزيز، صدّيق، صارصيلماز، ييلماز، ثباتكار، فداكار قارداشلرم!
    بويله شدّتلى تعرّضلره قارشى سزى تشجيعه لزوم گورمييورم. سزڭ قوّتلى متانتڭز و رسالۀِ النوره گلن هر حادثۀِ أليمه‌نڭ آلتنده بر عنايت و رحمت بولنديغنه ِإعتقاديڭز، تشجيعڭزه كافيدر، بيليورز. يالڭز بر نقطه‌يى مراق ايدييورم. ألده ايديلن بتون رسالۀِ النور، يالڭز بر طاقم ميدر و كيمڭ ايمش؟ آڭلامق ايسته‌يورم. هر كيمڭسه مراق ايتمه‌سين. داها أهمّيتلى مقاملرده اونڭ حسابنه فتوحات ياپارلر، ثواب قزانديرر. اوڭا، بر طاقم رسالۀِ النور تدارك ايديله‌بيلير. هم توقيف آلتنده كيمسه وار مى؟ هم اوڭا حواله ايديلن خواجه كيمدر؟
    ثانيًا: صبرى ايله حافظ علينڭ رأيى ايله تسهيلِ مخابره ايچون ويرديگى قرار ايله بعضًا آتابگ يوليله مخابره‌يى، اونلر گبى بز ده قبول ايتدك. لطفينڭ بر وارثى عبد اﷲ چاوش ناميله، آدرسيله گوندريله‌جك.
    ثالثًا: صبرينڭ مكتوبنده، توافقلى يازديغى معجزاتِ قرآنيه و رسالۀِ النور حقّنده‌كى إستخراجى بزى فوق العاده مسرور أيلدى. حسن عاطفڭ بزه يازديغى شعشعه‌لى و جاذبه‌دار معجزاتِ قرآنى أساس ياپوب، سائر رساله‌لرده، إعجازِ قرآنڭ نكته‌لرينه دائر مباحثى اوڭا ذيللر شكلنده إلحاق ايتدك، گوزل بر صورته گلدى.
    أزجمله: آيت الكبرانڭ قرآنه دائر اون يدنجى مرتبه‌سى، يگرمنجى سوز و سورۀِ فتحڭ آخركى آيتڭ معجزه اولديغنه دائر يدنجى لمعه و فهرسته‌نڭ رموزاتِ ثمانيه‌يه دائر مهم پارچه‌لرى و كنز العرشڭ ايكى نكته‌سى گبى پارچه‌لر او ذيللره گيرمش. عينًا معجزاتِ أحمديه‌نڭ ذيللرى گبى پارلامش. نورلر سانترالى صبرى، او يازديغى گوزل معجزاتِ قرآنيه‌‌يى إن شاء اﷲ اونلرله تام گوزللشديرر.
    رابعًا: مرحوم لطفينڭ حقيقى و پك جدّى بر وارثى اولان عبد اﷲ چاوشڭ مكتوبى، اونڭ درجۀِ صداقت و إخلاصنى و إرتباطنى گوستردى. هر وقت إسلام‌كويلى عبد اﷲ ايله او عبد اﷲ چاوشى دعاده برابر ياد ايدييوردم. الحقّ او مقامه لايق اولديغنى گوسترييور. ايستديگى فهرسته‌نڭ مصحّح صوڭ قسمى إن شاء اﷲ اوڭا گوندريله‌جك. فقط ظنّ ايتديگى گبى چوق تصحيحات ايديلمه‌مش. چونكه تقسيم الأعمال صورتيله، او مبارك قارداشلريمڭ يازيلرينى، مبارك يادگار گوردم و دگيشديرمگه قيامدم.