عزيز، صدّيق قارداشلرم!
    بو دفعه صبرى و حافظ علينڭ مكتوبلرى، رسالۀِ النورڭ فوق العاده بر كرامتنى و خارقه قوّتنى گوسترييور. مدرسۀِ نوريه‌نڭ چاليشقان و غيّور طلبه‌لرى بر قاچ گون ظرفنده، حافظ محمدڭ ضايع اولان كتابلرينه مقابل عمومنڭ يازيلماسنى و اوڭا ويريلمه‌سنى تعهّد ايدينمه‌لرينه، بو حواليده‌كى شاكردلرى فوق العاده مسرور أيلدى. حافظ علينڭ تحقيقاتنه گلنلرڭ، ”مغازه‌لرده كاغد قالمادى. رسالۀِ النور شاكردلرى كاغدى بيتيرديلر“ دييه ديمه‌لرى و محمد زهدينڭ كتابلرى كندينه إعاده ايديلمه‌لرى، رسالۀِ النور شاكردلرينى مفتخرانه تشجيع و تشويق ايدن بر حادثه‌در. صبرى مكتوبنده، ”ايكى اوچ سنه‌در رسالۀِ النور، تأليف جهتنده توقّف دوره‌سنى گچيرييور“ دييه حكمتنى صورويور. بونڭ جوابى اوزوندر. هم تأليف، إختيارمز دائره‌سنده دگل. هم رسالۀِ النور شاكردلرينڭ تأليفدن حصّه‌لرى قالمق ايچون، بعض أهمّيتلى أسباب و عارضه‌لر مانع اولدى.
    بوراده باشده آسيه اولارق علويه، لطفيه گبى چوق چاليشقان خانم شاكردلر، مدرسۀِ نوريه‌ده‌كى همشيره‌لرينه و سلام گوندرن صبرينڭ رفيقه‌سنه هم قارداشلرينه عرضِ حرمت و سلام و دعا ايدرلر.
    عموم قارداشلريمزه برر برر سلام و دعا ايدرز.