هم حادثاتِ بركتڭ عين زماننده، رسالۀِ النورڭ بر كرامتى اولارق، بر شاكردينڭ بيڭلرجه ليرا قيمتنده خانه‌سنى، اوڭا پك ياقين دهشتلى بر يانغيندن فوق المأمول بر صورتده رسالۀِ النورڭ بركتيله قورتولماسى و رسالۀِ النور ترجماننه آخرت جهتنده چوق علاقه‌دارلق گوسترن بر خانم، او دهشتلى يانغينده يانان خانه‌نڭ اوچنجى قاتنده بولنان ألماس و مجوهرات و آلتونلرينى قورتارمق ايچون قوشوب چيقديغى وقت، آتش هر طرفى صارمش، مجوهراتنى قورتاره‌مديغى گبى، كندى نفسنى ده بتون بتون تهلكۀِ قطعيه‌ده گورديگى دقيقه‌ده، رسالۀِ النور ترجمانى، او آتشدن طلبه‌سنڭ خانه‌سنى قورتارمسنه شدّتلى دعا ايدركن، او بيچاره خانم خاطرينه گلمش؛ عجبا او يانغينده او آخرت همشيره‌م بولنماسين دييه اوڭا ده (رسالۀِ النورى شفاعتجى ياپه‌رق) دعا ايتمش. ”يا ربّى اوڭا مرحمت أيله!“ نياز ايتمش. عين زمانده، او خانم پنجره‌يى قيرمش، كندينى ايكى قات يوكسكلكدن آولويه آتمش، فوق العاده بر صورتده نه اينجينمش، نه ده بر يرى قيريلمش. هم باقيرى و دميرى أريتن او دهشتلى و شدّتلى يانغيندن، (بتون قوناق ياندقدن صوڭره) بتون مجوهراتى و آلتونى هيچ برى ضايع اولميه‌رق، بوزولميه‌رق بر اون اونى محافظه ايتمش؛ بولمش، آلمش. رسالۀِ النورڭ بركتندن، هم جاننى، هم مالنى قورتارمش. هم مذكور حادثات زماننده وقوع بولمسى مناسبتيله، رسالۀِ النورڭ كرامتكارانه ايكى طوقادى، عين آنده، وظيفه‌جه أهمّيتلى ايكى متجاوز و مُعَجِّزْ ايكى آدمڭ تجاوز و تعجيز آننده برينڭ قفاسنه، ديگرينڭ جگرينه وورمه‌سى (حاشيه)، بزده هيچ بر شبهه بيراقمدى كه، خدمتِ قرآنده‌كى عنايتِ ربّانيه‌نڭ بر حفظ و حمايت سيلله‌سيدر. ”آرتيق يتر، طوريڭز! طوقاته مستحق اولديڭز“ دييه معنًا سويله‌مسيدر.