(اوتوز بر، اوتوز ايكنجى آيتلرڭ رسالۀِ النوره إشارتلرينى إستخراج ايتمگه موفّق اولان أحمد نظيف و اوغلى صلاح الدين، رسالۀِ النورڭ أهمّيتلى شاكردلرندن اولديغندن، صلاح الدّينڭ شو فقره‌سى، يگرمى يدنجى مكتوبڭ فقره‌لرى ايچنه گيرمگه لايقدر.)
    (١٣٥٨) سنه‌سى دانيزيقدن چيقان بر قيويلجيم آوروپا ايچريسنه سرعتله ياييلارق بيوك بر يانغين حالنى آلدىغندن، بتون ملّتلر سفرى وضعيتنده بولنديغندن توركيه ده قسمى سفربرلك ياپدى. (١٣٥٩)ده ٢٧، ٢٨، ٢٩ طوغومليلرى سلاح آلتنه آلدى. بو ميانده، رسالۀِ النور طلبه‌لرندن محمد فيضى و بن گبى كوچك طلبه‌لر ده، بر حكمته بناءً عسكره آلينمشدى (حاشيه). استاديمز، يالڭز آلتى يدى آى قدر، رسالۀِ النورڭ إنتشارى خصوصنده باشقه محيطده بولونمامز ايجاب ايتديگندن، قلب، فكر و آووجنى جنابِ حقّڭ رحمتنه آچديغى معنًا آڭلاشيلديغندن، بو دعاسنڭ قبولى رسالۀِ النورڭ مهم بر كرامتى نتيجه‌سى اولارق باشقه محيطه عسكرلك وظيفه‌سى ايچنده، رسالۀِ النوره خدمت ايچون گوندريلدك. آلتى يدى آى صوڭره، فيضى و صلاح الدين وظيفۀِ نشرى ياپدقدن صوڭره، مذكور قرعه‌لرڭ أڭ تهلكه‌لى بر زمانده آلمان اردولرى رومانيايى إشغال، بلغارستانى تضييق، ايتاليا ده يونانستانله حرب ايتديگى بر صيراده ترخيصلريله او كرامت آڭلاشيلمشدر. (حاشيه*)