ديمشدم: رسالۀِ النورڭ خدمت ايتديگى حقائقِ ايمانيه هر شيئڭ فوقنده اولديغى گبى، بو زمانده هر شيدن زياده اونلره إحتياج وار. فقط قلبنى ئولديرمش، نفسنى هوساتله شيمارتمش ملحدلر، ايمانده‌كى حقيقتڭ درجۀِ إحتياجنى إنكار ايتدكلرندن، ”أهلِ ديانت و أهلِ علمى سَوق ايدن، تحريك ايدن مقاصدِ دنيويه و إحتياجاتيدر“ دييه إتهام ايدييورلر. او إتهامه گوره ده، پك إنصافسزجه‌سنه اونلره ايليشييورلر. بو بدبخت ملحدلرى قطعى بر صورتده إسكات ايتمك، بِالفعل (مادّةً) اويله فداكارلر لازم كه، دنيانڭ أڭ مهم مشغله‌لرى بلكه بيوك ضررلرى، اونلرڭ حقائقِ ايمانيه إحتياجلرىنى صوصديرمييور.
    عجبا اويله‌لرى وار مى؟ دييه خاطرلرينه گلدى. أوت واردر. ايشته إسپارطه ولايتى و حواليسى. ايشته صاندقلى طرفندن اوچ درت آى ظرفنده رسالۀِ النورى هر شيئه ترجيح ايدن أفه‌لرى و مجاهدلرى دييه دعوا ايتمشدم. ايكى ساعت صوڭره، هيچ مأمول ايتمديگمز بر طرزده، رحمة اﷲ نامنى آلان أمين، ايكى صندقله او دعوايه ايكى حجّت گوستردى.
    قارداشمز كاتب عثمانڭ مكتوبى، آيرى آيرى چوق مراقلريمه بر مرهم اولدى. جنابِ حق اونڭ گبى رسالۀِ النوره بيڭلر شاكردلرى او مدرسۀِ نورانيده يتيشديرسين، آمين.
    عاطفڭ ده صاندقلى طرفنه گيتمسى، موفّقيت قزانمسى، دگل بزلرى، ملائكه‌لرى ده سَوينديردى. قريۀِ عرفان نامى إن شاء اﷲ بر مدرسۀِ نوريه اولور. ذاتًا عاطفده‌كى إخلاص، اويله نتيجه ويره‌جگنى حسّ ايدييوردم.
    گل، نور، مبارك، مدرسۀِ نوريه، معصوم، إختيارلر هيئتنه بيڭلر سلام و سلامتلرينه دعا ايدييورز.
    اون اوچ سنه أوّل بارلاده، بش مِثلى بركتله كرامت درجه‌سنه چيقان طاتلى لقمه‌لرى و او لقمه‌لرى هديه ايدن، چوق مبارك حاجى حافظى سُرور ايله خاطريمزه گتيرن بو يڭى گلن طاتلى لقمه‌لرى، بش چشيد طاتلى گلدى. هر بر دانه‌سنه سزلره جنابِ حق جنّتده بيڭلر جنّت طاتليلرى ويرسين، آمين.