عزيز، صدّيق قارداشلرم!
    بو دفعه حافظ علينڭ و خليل إبراهيمڭ و لطفينڭ بر وارثى عبد اللّٰهڭ، أهمّيتلى اوچ مكتوبلرينى آلدم. حافظ علينڭ حزبِ قرآنى و حزبِ نوريده‌كى ياڭليشلردن تأثّرينى بيلديرييور. قطعيًا او بيلسين كه؛ او و طاهرى و حافظ مصطفى و آرقداشلرينڭ غيرتلريله طبع ايديلن او ايكى حزب، بو زمانده، بو شرائط ايچنده غايت پارلاق بر مظفّريتِ نوريه‌در. اونلرڭ دفترِ أعمالنه، هر طرفده حسناتلرى گچيريلير. كيم اوقوسه، اونلرڭ حصّه‌سى وار. ياڭليشلرى، تخمينمزدن چوق آزدر. ِﷲ الحمد قولايجه تصحيح ايتدك. لايق أللره گيرمش.
    خليل إبراهيمڭ، رسالۀِ النور حقّنده غايت طاتلى و گوزل و مطابق تمثيلى و توصيفى، (ايچنده) صميمى إخلاصندن و قناعتندن گلديگى جهتله، بزجه غايت پارلاق و أديبانه دوشمش. رسالۀِ النوره عائد قسمنى لاحقه‌يه يازه‌جغز. حقيقةً رسالۀِ النورڭ مهم و ثباتكار و دائمى بر ركنى اولديغنه شبهه قالمه‌مش. اوڭا و رفقاسنه هر گون خصوصى دعالريمزه، قزانجلريمزه، خصوصًا اينجه محمد حصّه‌دار اولمالرينى و سلاممزى تبليغ ايدرسڭز.
    مرحوم لطفينڭ جدّى و حقيقى بر وارثى اولان عبد اللّٰهڭ مكتوبنده، رسالۀِ النورله علاقه‌دار اولان باشده طاهرى و باباسى و على و وهبى، شكرى، مصطفى، محمد، حسين، محمد، حقّى و بِالخاصّه أسكيدن رسالۀِ النورده موقعى بولنان بيوك زهدى گبى قارداشلريمزڭ سلاملرى بنى چوق زياده مسرور أيلدى. بن ده او قارداشلريمزه هم سلام، هم دعا، هم إستدعا ايدييورم. اونڭ مكتوبنده‌كى سؤاللرى ايسه، شيمدى بو دقيقه‌ده ايسه ذهنم باشقه يرله مشغول، اونلرڭ جوابنه باقامييور.     ..............
    اوچنجى مسئله: بر قارداشمز قصورينى گورمديگى مناسبتيله، اونى ايقاظ ايچون يازيلمش اينجه بر مسئله‌در. بلكه سزه فائده‌سى اولور دييه يازدق
    بر زمان أولياءِ عظيمه‌دن نفسِ أمّاره‌سندن قورتولانلردن بر قاچ ذاتدن، شدّتلى مجاهدۀِ نفسيه‌لر و نفسِ أمّاره‌دن شكوالرينى گوردم. چوق حيرت ايدييوردم. خيلى زمان صوڭره، نفسِ أمّاره‌نڭ كندى دسائسندن باشقه، داها شدّتلى و داها زياده سوز ديڭله‌مز و داها زياده أخلاقِ سيّئه‌ىى إدامه ايدن و هوس و طمار و أعصاب، طبيعت و حسّيات خليطه‌سندن چيقان و نفسِ أمّاره‌نڭ صوڭ تحصّنگاهى بولنان و نفسِ أمّاره‌يى تزكيه‌دن صوڭره اونڭ أسكى وظيفۀِ سيّئه‌سنى گورن و مجاهده‌يى آخر عمره قدر دوام ايتديرن، بر معنوى نفسِ أمّاره‌يى گوردم. و آڭلادم كه، او مبارك ذاتلر حقيقى نفسِ أمّاره‌دن دگل؛ بلكه مجازى بر نفسِ أمّاره‌دن شكوا ايتمشلر. صوڭره گوردم كه، إمامِ ربّانى دخى بو مجازى نفسِ أمّاره‌دن خبر ويرييور. بو ايكنجى نفسِ أمّاره‌ده شعورسز كور حسّيات بولونديغى ايچون، عقل و قلبڭ سوزلرىنى آڭلامييور و ديڭله‌ميور كه، اونلرله إصلاح اولسون و قصورينى آڭلاسين. يالڭز طوقاتلر و ألملر ايله نفرت ايدوب ويا تام بر فدائيلكله هر حسّنى مقصدينه فدا ايتسين. و رسالۀِ النورڭ أركانلرى گبى هر شيئنى، أنانيتنى بيراقسين