عزيز قارداشم خسرو!
    جنابِ حق مرحومه‌يى مغفرت أيله‌سين و سڭا و اونڭ أولادلرينه صبرِ جميل إحسان أيله‌سين! بن ده ماتمڭزه جدًّا حصّه‌دارم.
    سنڭ آغلاماڭه و آغلايان مكتوبڭه إشتراك ايتدم. أوت سن ده بنم گبى، دنيا ايله ايكى جهتله علاقه‌ڭ كسيلييور. هم اويله لازم. سنڭ گبى رسالۀِ النورڭ بر فدائيسى علاقه‌سى اولمه‌ملى و علاقه پيدا ايتمه‌ملى. علاقه‌لى اولسه فوق العاده بر ثبات، بر إخلاصڭ لزومى ايله برابر؛ بعض عارضه‌لر ايچنده صارصيلير، تام فداكارلق ايده‌مز. او حوالينڭ قهرمانلرى الحقّ مستثنادرلر. علاقه‌لر اونلرى صارصمايور. فقط بعضلرى؛ خسرو گبى، سعيد گبى و عاطف و أمثالى گبى بتون بتون علاقه‌سز ده بولونمق لازم.
    او مرحومه شيمدى‌يه قدر، رسالۀِ النورڭ خاص طلبه‌لرى ايچنده، دائما هر گون يوز دفعه‌يه ياقين و خصوصى إسميله ده، بر دفعه فجرده معنوى قزانجلريمزه اون سنه‌در حصّه‌داردر. شيمدى وفاتندن صوڭره إسميله هر گون، چوق دفعه خصوصى دعالرده حصّه‌دار اولديغى زمان گبى، ينه يوز دفعه حصّه‌دار اولويور.
    عزيز قارداشم خسرو! سنڭله چوق قونوشمق ايسته‌يورم. فقط بو دقيقه‌ده او قدر وقتم طاردر كه، زيارته گلن دوست درت بش آدمه قارشى ”بنى مشغول ايتمه‌يڭز“ دييه لزومسز حدّت ايتدم. هر نه ايسه... اوراده‌كى قارداشلريمزه حسرت و إشتياقله پك چوق سلام و سلامتلرينه دعا ايدييورم. بوراده‌كى قارداشلريڭز ده سزى تعزيه و اوراده‌كى قارداشلرينه عرضِ حرمتله سلام ايدييورلر.
* * *
    عزيز، صدّيق قارداشلرم!
    حزبِ نورى‌ده؛ هم {تَفَكُّرُ سَاعَةٍ} سرّى، هم كلّى بر عبوديت بولنديغندن؛ شيمدى بو وقتده، قوّتلى بر أماره‌يى مشاهده ايتدم. بوگون رسالۀِ النورڭ حزبِ نوريسندن بر قسمنى و جوشن الكبيردن دخى بر قسمنى اوقوركن گوردم كه؛ كائناتڭ أنواعنى و عالملرينى يگرمى طوقوزنجى مكتوبڭ آخر قسمى {اَﷲُ نُورُ السَّمٰوَاتِ وَاْلاَرْضِ} آيتنڭ بياننده، سياحتِ قلبيه ايله، هر بر إسمِ إلٰهى بو كائناتده‌كى بر عالمى نورلانديرديغنى و ظلماتى طاغيتديغنى گورديگم گبى؛ عينًا و داها باشقه بر شكلده، جوشن الكبير و رسالۀِ النور و حزبِ نورى دخى كائناتى باشدن باشه نورلانديرييور، ظلمات قراڭلقلرينى طاغيتييور.. غفلتلرى، طبيعتلرى پارچه پارچه ايدييور. أهلِ غفلت و أهلِ ضلالتڭ آلتنده صاقلانمق ايستدكلرى پرده‌لرى ييرتييور گوردم. كائناتى، أنواعيله پاموق گبى حلاّج ايدييور، طراقلر ايله طرييور مشاهده ايتدم. أهلِ ضلالتڭ بوغولديغى أڭ صوڭ و أڭ گنيش كائنات پرده‌لرينڭ آرقه‌سنده، أنوارِ توحيدى گوسترييور.