صوڭره شو كائناتڭ يوزلرنده دگيشن موجودات آيينه‌لرنده جمال و جلال و كمال و كبرياسنڭ إظهارينه قارشى، {اَﷲُ اَكْبَرُ} دييوب تعظيم ايچنده بر عجزله ركوعه گيدوب محويت ايچنده بر محبّت و حيرتله سجده ايدوب مقابله ايتديلر. صوڭره او غنىِّ مطلقڭ ثروتنڭ چوقلغنى و رحمتنڭ گنيشلگنى گوسترمسنه قارشى؛ فقر و حاجتلرينى إظهار ايدوب، دعا ايدوب، ايسته‌مكله مقابله ايدوب {وَ اِيَّاكَ نَسْتَعِينُ} ديديلر.

صوڭره او صانعِ ذو الجلالڭ كندى صنعتنڭ لطيفلرينى، خارقه‌لرينى، آنتيقه‌لرينى، سرگيلرله تشهيرگاهِ أنامده نشرينه قارشى {مَاشَاءَ اﷲُ} دييوب تقدير ايده‌رك، ”نه گوزل ياپيلمش!“ دييوب إستحسان ايده‌رك، {بَارَكَ اﷲُ} دييوب مشاهده ايتمك، {اٰمَنَّا} دييوب شهادت ايتمك؛ ”گليڭز، باقڭز!“ حيران اولارق {حَىَّ عَلَى الْفَلاَحِ} دييوب هركسى شاهد طوتمقله مقابله ايتديلر. هم او سلطانِ أزل و أبد، كائناتڭ أقطارنده كندى ربوبيتنڭ سلطنتنى إعلاننه و وحدانيتنڭ إظهارينه قارشى؛ توحيد و تصديق ايدوب {سَمِعْنَا وَ اَطَعْنَا} دييه‌رك إطاعت و إنقياد ايله مقابله ايتديلر.

صوڭره او ربّ العالمينڭ الوهيتنڭ إظهارينه قارشى؛ ضعف ايچنده عجزلرينى، إحتياج ايچنده فقرلرينى إعلاندن عبارت اولان عبوديت ايله و عبوديتڭ خلاصه‌سى اولان ”نماز“ ايله مقابله ايتديلر. داها بونلر گبى گونا گون عبوديت وظيفه‌لريله شو دارِ دنيا دينلن مسجدِ كبيرنده فريضۀِ عمرلرينى و وظيفۀِ حياتلرينى أدا ايدوب أحسنِ تقويم صورتنى آلديلر. بتون مخلوقات اوستنده بر مرتبه‌يه چيقديلر كه، يُمنِ ايمان ايله أمن و أمانت ايله مجهّز أمين بر خليفۀِ أرض اولديلر. و شو ميدانِ تجربه و شو دستگاهِ إمتحاندن صوڭره اونلرڭ ربِّ كريمى اونلرى، ايمانلرينه مكافات اولارق سعادتِ أبديه‌يه و إسلاميتلرينه اجرت اولارق دار السلامه دعوت ايده‌رك اويله بر إكرام ايتدى و ايدر كه، هيچ گوز گورمه‌مش و قولاق ايشيتمه‌مش و قلبِ بشره خطور ايتمه‌مش درجه‌ده پارلاق بر طرزده رحمتنه مظهر ايتدى و اونلره أبديت و بقا ويردى. چونكه أبدى و سرمدى اولان بر جمالڭ سيرجى مشتاقى و آيينه‌دار عاشقى، ألبته باقى قالوب أبده گيده‌جكدر. ايشته قرآن شاكردلرينڭ عاقبتلرى بويله‌در. جنابِ حق بزلرى اونلردن أيله‌سين، آمين!