سوزلر | اون سكزنجى سوز | 305
(301-306)

شيمدى ايكى لوحه، ايكى دائره گورونويور. برى: غايت محتشم، منتظم بر دائرۀِ ربوبيت و غايت مصنّع، مرصّع بر لوحۀِ صنعت... ديگرى: غايت منوّر، مزهّر بر دائرۀِ عبوديت و غايت واسع، جامع بر لوحۀِ تفكّر و إستحسان و تشكّر و ايمان واردر كه، ايكنجى دائره بتون قوّتيله برنجى دائره‌نڭ نامنه حركت ايدر.


ايشته او صانعڭ بتون مقاصدِ صنعت‌پرورانه‌سنه خدمت ايدن او دائره رئيسنڭ نه درجه او صانع ايله مناسبتدار و اونڭ نظرنده نه قدر محبوب و مقبول اولديغى بِالبداهه آڭلاشيلير.


عجبا هيچ عقل قبول ايدر مى كه: شو گوزل مصنوعاتڭ بو درجه صنعت‌پرور، حتّى آغزڭ هر چشيد طادينى نظره آلان إنعام‌پرور صنعتكارى، عرش و فرشى چينلاتديره‌جق بر ولولۀِ إستحسان و تقدير ايچنده، برّ و بحرى جذبه‌يه گتيره‌جك بر زمزمۀِ شكران و تكبير ايله پرستشكارانه اوڭا متوجّه اولان أڭ گوزل مصنوعنه قارشى لاقيد قالسين و اونڭله قونوشماسين و علاقه‌دارانه اونى رسول ياپوب، گوزل وضعيتنڭ باشقه‌لره ده سرايت ايتمسنى ايسته‌مسين؟ كلاّ! قونوشمامق و اونى رسول ياپمامق ممكن دگل.


اِنَّ الدِّينَ عِنْدَ اﷲِ اْلاِسْلاَمُ ❊ مُحَمَّدٌ رَسُولُ اﷲِ وَ الَّذِينَ مَعَهُ

سس يوق

سوزلر