أشيا، وجود و تشخّصاتلرنده، نهايتسز إمكانات يوللرى ايچنده متردّد، متحيّر، شكلسز بر صورتده ايكن، بردن بره غايت منتظم، حكيمانه اويله بر تشخّص وجهى ويريلييور كه؛ مثلا هر بر إنسانڭ يوزنده، بتون أبناىِ جنسندن هر بريسنه قارشى برر علامتِ فارقه، او كوچك يوزده بولونديغى و ظاهر و باطن طويغولريله كمالِ حكمتله تجهيز ايديلديگى جهتله، او يوز غايت پارلاق بر سكّۀِ أحديت اولديغنى إثبات ايدر. هر بر يوز، يوزر جهتله بر صانعِ حكيمڭ وجودينه شهادت و وحدتنه إشارت ايتدكلرى گبى، بتون يوزلرڭ هيئتِ مجموعه‌سيله إظهار ايتدكلرى او سكّه، بتون أشيانڭ خالقنه مخصوص بر خاتم اولديغنى عقل گوزينه گوسترر.

أى منكِر! هيچ بر جهتله قابلِ تقليد اولميان شو سكّه‌لرى و مجموعنده‌كى پارلاق سكّۀِ صمديتى هانگى تزگاهه حواله ايده‌بيليرسڭ؟...

زمينڭ يوزنده درت يوز بيڭ مختلف طائفه‌دن (حاشيه) عبارت اولان بتون حيوانات و نباتات أنواعنڭ اوردوسى؛ بِالمشاهده آيرى آيرى أرزاقلرى، صورتلرى، سلاحلرى، لباسلرى، تعليماتلرى، ترخيصاتلرى كمالِ ميزان و إنتظامله هيچ بر شى اونوتلميه‌رق، هيچ برينى شاشيرميه‌رق بر صورتده تدبير و تربيه ايتمك اويله بر سكّه‌در كه؛ (هيچ بر شبهه قبول ايتمز) گونش گبى پارلاق بر سكّۀِ واحدِ أحددر. حدسز بر قدرت و محيط بر علم و نهايتسز بر حكمت صاحبندن باشقه كيمڭ حدّى وار كه، او حدسز درجه‌ده خارقه اولان شو إداره‌يه قاريشسين. چونكه شو بربرى ايچنده گرفت اولان أنواعلرى، ملّتلرى، عمومنى بردن إداره و تربيه ايده‌مه‌ين، اونلردن بريسنه قاريشسه ألبته قاريشديره‌جق. حالبوكه {فَارْجِعِ الْبَصَرَ هَلْ تَرٰى مِنْ فُطُورٍ} سرّيله، هيچ بر قاريشق علامتى يوقدر. ديمك كه هيچ بر پارمق قاريشه‌ميور.