سوزلر | لمعات | 941
(925-1019)
مبطل، باطلى حق نظريله آلير

إنسانده‌كى فطرتى مكرّم اولديغندن، قصدًا حقّى آرايور. بعضًا گلير ألنه، باطلى حق ظن ايدر، قويننده صاقلايور.

حقيقتى قازاركن إختيارى اولمادن ضلال دوشر باشنه؛ حقيقتدر ظن ايدر، قفاسنه گچيرر.


قدرتڭ آيينه‌لرى چوقدر

قدرتِ ذو الجلالڭ پك چوقدر مرآتلرى. هر برى اوته‌كندن داها أشفّ و ألطف پنجره‌لر آچييور بر عالمِ مثاله.

صودن هوايه قدر، هوادن تا أثيره، أثيردن تا مثاله، مثالدن تا أرواحه، أرواحدن تا زمانه، زماندن تا خياله،

خيالدن فكره قدر مختلف آيينه‌لر، دائما تمثيل ايدر شئوناتِ سيّاله.

قولاغڭله نظر ايت آيينۀِ هوايه: كلمۀِ واحده، اولور ميليون كلمات!

عجيب إستنساخ ايدر او قدرتڭ قلمى.. شو سرِّ تناسلات...


تمثّلڭ أقسامى مختلفه‌در

آيينه‌ده تمثّل، منقسم درت صورته: يا يالڭز هويت؛ يا برابر خاصيت؛ يا هويت هم شعلۀِ ماهيت؛ يا ماهيت، هويت.

أگر مثال ايسترسه‌ڭ، ايشته إنسان و هم شمس، مَلك و هم كلمه. كثيفڭ تمثاللرى، آيينه‌ده اولويور برر متحرّك ميّت.

سس يوق

سوزلر