سوزلر | طوقوزنجى سوز | 52
(52-61)

طوقوزنجى سوز

بِسْمِ اﷲِ الرَّحْمٰنِ الرَّحِيمِ
فَسُبْحَانَ اﷲِ حِينَ تُمْسُونَ وَ حِينَ تُصْبِحُونَ ❊
وَ لَهُ الْحَمْدُ فِى السَّمٰوَاتِ وَ اْلاَرْضِ وَ عَشِيًّا وَ حِينَ تُظْهِرُونَ
   أى برادر! بندن، نمازڭ شو معيّن بش وقته حكمتِ تخصيصنى صورييورسڭ. پك چوق حكمتلرندن يالڭز بريسنه إشارت ايدرز
   أوت هر بر نمازڭ وقتى، مهمّ بر إنقلاب باشى اولديغى گبى، عظيم بر تصرّفِ إلٰهينڭ آيينه‌سى و او تصرّف ايچنده إحساناتِ كلّيۀِ إلٰهيه‌نڭ برر معكسى اولديغندن، قديرِ ذو الجلاله او وقتلرده داها زياده تسبيح و تعظيم و حدسز نعمتلرينڭ ايكى وقت اورته‌سنده طوپلانمش يكوننه قارشى شكر و حمد ديمك اولان نمازه أمر ايديلمشدر. شو اينجه و درين معنايى بر پارچه فهم ايتمك ايچون ”بش نكته“يى نفسمله برابر ديڭله‌مك لازم...
   برنجى نكته: نمازڭ معناسى، جنابِ حقّى تسبيح و تعظيم و شكردر. يعنى، جلالنه قارشى قَولاً و فعلاً {سُبْحَانَ اﷲِ} دييوب تقديس ايتمك. هم كمالنه قارشى، لفظًا و عملاً {اَﷲُ اَكْبَرُ} دييوب تعظيم ايتمك. هم جمالنه قارشى، قلبًا و لسانًا و بدنًا {َالْحَمْدُ ِﷲِ} دييوب شكر ايتمكدر. ديمك تسبيح و تكبير و حمد، نمازڭ چكردكلرى حكمنده‌درلر. اوندندر كه، نمازڭ حركات و أذكارنده بو اوچ شى، هر طرفنده بولونويورلر. هم اوندندر كه، نمازدن صوڭره، نمازڭ معناسنى تأكيد و تقويه ايچون شو كلماتِ مباركه، اوتوز اوچ دفعه تكرار ايديلير. نمازڭ معناسى، شو مجمل خلاصه‌لرله تأكيد ايديلير

سس يوق

سوزلر