الجواب: سابقًا بيان ايتديگمز گبى، حضرتِ حسينڭ معارضلرى اولان أمويلر سلطنتنده، مرحمتسز غدره سببيت ويره‌جك اوچ أساس واردى

بريسى: مرحمتسز سياستڭ بر دستورى اولان: ”حكومتڭ سلامتى و آسايشڭ دوامى ايچون، أشخاص فدا ايديلير“

ايكنجيسى: اونلرڭ سلطنتى، عنصريت و ملّيته إستناد ايتديگى ايچون، ملّيتڭ غدّارانه بر دستورى اولان: ”ملّتڭ سلامتى ايچون هر شى فدا ايديلير“

اوچنجيسى: أمويلرڭ هاشميلره قارشى عنعنه‌سنده‌كى رقابت طمارى، يزيد گبى بعضلرده بولونديغى ايچون، شفقتسز بر غدره قابليت گوسترمشدى

دردنجى بر سبب ده حضرتِ حسينڭ طرفدارلرنده بولونويوردى كه؛ أمويلرڭ عرب ملّيتنى أساس طوتوب، سائر ملّتلرڭ أفرادينه ”مماليك“ تعبير ايده‌رك كوله نظريله باقمه‌لرى و غرورِ ملّيه‌لرينى قيرمالرى يوزندن، مللِ سائره حضرتِ حسينڭ جماعتنه إنتقامكارانه و مشوّش بر نيّتله إلتحاق ايتدكلرندن، أمويلرڭ عصبيتِ ملّيه‌لرينه فضله طوقونمش، غايت غدّارانه و مرحمتسزجه‌سنه مشهور فاجعه‌يه سببيت ويرمشلردر

مذكور درت أسباب، ظاهريدر. قدر نقطه‌سندن باقيلديغى وقت؛ حضرتِ حسين و أقرباسنه او فاجعه سببيله حاصل اولان نتائجِ اُخرويه و سلطنتِ روحانيه و ترقّياتِ معنويه او قدر قيمتداردر كه، او فاجعه ايله چكدكلرى زحمت، غايت قولاى و اوجوز دوشر. ناصلكه بر نفر، بر ساعت إشكنجه آلتنده شهيد ايديلسه؛ اويله بر مرتبه‌يى بولور كه، اون سنه باشقه‌سى چاليشسه، آنجق او مرتبه‌يى بولور. أگر او نفر شهيد اولدقدن صوڭره اوڭا صوريلابيلسه، ” آز بر شى ايله پك چوق شيلر قزاندم“ دييه‌جكدر.