أوت هر وقت سماواتدن ملائكه‌لرى يره گوندرن و بعض وقتده إنسان صورتنه وضع ايدن (حضرتِ جبريلڭ ”دحيه“ صورتنه گيرمه‌سى گبى) و روحانيلرى عالمِ أرواحدن گوندروب بشر صورتنه تمثّل ايتديرن، حتّى ئولمش أوليالرڭ چوقلرينڭ أرواحلرينى جسدِ مثاليله دنيايه گوندرن بر حكيمِ ذو الجلال، حضرتِ عيسى عليه السلامى، عيسى ديننه عائد أڭ مهمّ بر حسنِ خاتمه‌سى ايچون، دگل سماءِ دنياده جسديله بولونان و حياتده اولان حضرتِ عيسى، بلكه عالمِ آخرتڭ أڭ اوزاق كوشه‌سنه گيتسه ايدى و حقيقةً ئولسه ايدى، ينه شويله بر نتيجۀِ عظيمه ايچون اوڭا يڭيدن جسد گيديروب دنيايه گوندرمك، او حكيمڭ حكمتندن اوزاق دگل.. بلكه اونڭ حكمتى اويله إقتضا ايتديگى ايچون وعد ايتمش و وعد ايتديگى ايچون ألبته گوندره‌جك.

حضرتِ عيسى عليه السلام گلديگى وقت، هركس اونڭ حقيقى عيسى اولديغنى بيلمك لازم دگلدر. اونڭ مقَرَّب و خواصّى، نورِ ايمان ايله اونى طانير. يوقسه بداهت درجه‌سنده هركس اونى طانيميه‌جقدر.

سؤال: روايتلرده گلمش كه: ”دجّالڭ بر يالانجى جنّتى وار؛ كندينه تابع اولانلرى اوڭا آتار. هم يالانجى بر جهنّمى وار؛ تابع اولميانلرى اوڭا آتار. حتّى او كندى مركبينڭ ده بر قولاغنى جنّت گبى، بر قولاغنى ده جهنّم گبى ياپمش. عظمتِ بدنيه‌سى بو قدردر، شو قدردر...“ دييه تعريفات وار؟

الجواب: دجّالڭ شخصِ صوريسى إنسان گبيدر. مغرور، فرعونلاشمش، اللّٰهى اونوتمش اولديغندن؛ صورى، جبّارانه اولان حاكميتنه، الوهيت نامنى ويرمش بر شيطانِ أحمقدر و بر إنسانِ دسّاسدر. فقط شخصِ معنويسى اولان دينسزلك جريانِ عظيمى، پك جسيمدر. روايتلرده دجّاله عائد توصيفاتِ مدهشه اوڭا إشارت ايدر. بر وقت ژاپونيانڭ باش قومانداننڭ رسمى، بر آياغى بحرِ محيطده، ديگر آياغى اون گونلك مسافه‌ده‌كى پورت آرتر قلعه‌سنده تصوير ايديلمش. او كوچك ژاپون قومانداننڭ بو صورتده تصويريله، اوردوسنڭ شخصِ معنويسى گوستريلمش.