دردنجى سؤالڭزڭ مئالى: آخر زمانده حضرتِ عيسى عليه السلام دجّالى ئولديردكدن صوڭره، إنسانلر أكثريتله دينِ حقّه گيررلر. حالبوكه روايتلرده گلمشدر كه: ”ير يوزنده اﷲ اﷲ ديينلر بولوندقجه قيامت قوپماز.“ بويله عموميتله ايمانه گلدكدن صوڭره ناصل عموميتله كفره گيدرلر؟

الجواب: حديثِ صحيحده روايت ايديلن: ”حضرتِ عيسى عليه السلامڭ گله‌جگنى و شريعتِ إسلاميه ايله عمل ايده‌جگنى، دجّالى ئولديره‌جگنى“ ايمانى ضعيف اولانلر إستبعاد ايدييورلر. اونڭ حقيقتى ايضاح ايديلسه، هيچ إستبعاد يرى قالماز. شويله كه:

او حديثڭ و سفيان و مهدى حقّنده‌كى حديثلرڭ إفاده ايتدكلرى معنا بودر كه: آخر زمانده دينسزلگڭ ايكى جريانى قوّت بولاجق:

بريسى: نفاق پرده‌سى آلتنده، رسالتِ أحمديه‌يى (ع‌ص‌م) إنكار ايده‌جك سفيان نامنده مدهش بر شخص، أهلِ نفاقڭ باشنه گچه‌جك، شريعتِ إسلاميه‌نڭ تخريبنه چاليشه‌جقدر. اوڭا قارشى آلِ بيتِ نبوينڭ سلسلۀِ نورانيسنه باغلانان، أهلِ ولايت و أهلِ كمالڭ باشنه گچه‌جك آلِ بيتدن محمّد مهدى إسمنده بر ذاتِ نورانى، او سفيانڭ شخصِ معنويسى اولان جريانِ منافقانه‌يى ئولديروب طاغيداجقدر.

ايكنجى جريان ايسه: طبيعيّون، مادّيون فلسفه‌سندن تولّد ايدن بر جريانِ نمرودانه، گيتدكجه آخر زمانده فلسفۀِ مادّيه واسطه‌سيله إنتشار ايده‌رك قوّت بولوب، الوهيتى إنكار ايده‌جك بر درجه‌يه گلير. ناصل بر پادشاهى طانيميان و اوردوده‌كى ضابطان و أفراد اونڭ عسكرلرى اولديغنى قبول ايتمه‌ين وحشى بر آدم، هركسه، هر عسكره بر نوع پادشاهلق و بر گونا حاكميت ويرر. اويله ده: اللّٰهى إنكار ايدن او جريان أفرادلرى، برر كوچك نمرود حكمنده نفسلرينه برر ربوبيت ويرر. و اونلرڭ باشنه گچن أڭ بيوكلرى، إسپرتيزمه و مانيه‌تيزمه‌نڭ حادثاتى نوعندن مدهش خارقه‌لره مظهر اولان دجّال ايسه؛ داها ايلرى گيدوب، جبّارانه صورى حكومتنى بر نوع ربوبيت تصوّر ايدوب الوهيتنى إعلان ايدر. بر سينگه مغلوب اولان و بر سينگڭ قنادينى بيله ايجاد ايده‌مه‌ين عاجز بر إنسانڭ الوهيت دعوا ايتمه‌سى، نه درجه أحمقجه‌سنه بر مسخره‌لق اولديغى معلومدر.