الجواب: درجاتلرينه گوره متأثّر اولاجقلر. ملائكه‌لرڭ تجلّياتِ قهريه‌ده كنديلرينه گوره متأثّر اولدقلرى گبى متأثّر اولورلر. ناصلكه بر إنسان، صيجاق بر يرده ايكن، خارجده قار و تيپى ايچنده تيتره‌ينلرى گورسه، عقل و وجدان إعتباريله متأثّر اولور. اويله ده: ذى‌شعور اولان أرواحِ باقيه، كائناتله علاقه‌دار اولدقلرى ايچون، كائناتڭ حادثاتِ عظيمه‌سندن درجه‌لرينه گوره متأثّر اولمالرينى؛ أهلِ عذاب ايسه ألمكارانه، أهلِ سعادت ايسه حيرتكارانه، إستغرابكارانه، بلكه بر جهتده إستبشاركارانه تأثّراتلرى بولونماسنى، إشاراتِ قرآنيه گوسترييور. زيرا قرآنِ حكيم، هر زمان قيامتڭ عجائبنى تهديد صورتنده ذكر ايدييور. ”گوره‌جكسڭز...“ دييور. حالبوكه جسمِ إنسانى ايله اونى گورنلر، قيامته يتيشنلردر. ديمك، قبرده جسدلرى چوروين أرواحلرڭ ده او تهديدِ قرآنيه‌دن حصّه‌لرى وار.

آلتنجى سؤالڭزڭ مئالى: {كُلُّ شَيْءٍ هَالِكٌ اِلاَّ وَجْهَهُ} بو آيتڭ آخرته، جنّته، جهنّمه و أهللرينه شمولى وار مى، يوق مى؟

الجواب: شو مسئله، پك چوق أهلِ تحقيق و أهلِ كشف و أهلِ ولايتڭ مدارِ بحثى اولمش. شو مسئله‌ده سوز اونلرڭدر. هم ده شو آيتڭ چوق گنيشلگى و چوق مراتبى وار. أهلِ تحقيقڭ بر قسمِ أكثرى ديمشلر كه: عالمِ بقايه شمولى يوق. ديگر قسمى ايسه: آنى اولارق اونلر ده آز بر زمانده، بر نوع هلاكته مظهر اولورلر. او قدر آز بر زمانده اولويور كه، فنايه گيدوب گلمش حسّ ايتميه‌جكلر. امّا بعض مفرط فكرلى أهلِ كشفڭ حكم ايتدكلرى فناىِ مطلق ايسه، حقيقت دگلدر. چونكه ذاتِ أقدسِ إلٰهى مادام سرمدى و دائميدر؛ ألبته صفاتى و أسماسى دخى سرمدى و دائميدرلر. مادام صفاتى و أسماسى دائمى و سرمديدرلر؛ ألبته اونلرڭ آيينه‌لرى و جلوه‌لرى و نقشلرى و مظهرلرى اولان عالمِ بقاده‌كى باقيات و أهلِ بقا، فناىِ مطلقه بِالضروره گيده‌مز.