اوچنجى رمز: أشيا زوال و عدمه گيتمييور، بلكه دائرۀِ قدرتدن دائرۀِ علمه گچييور؛ عالمِ شهادتدن، عالمِ غيبه گيدييور؛ عالمِ تغيّر و فنادن، عالمِ نوره، بقايه متوجّه اولويور. حقيقت نقطۀِ نظرنده أشياده‌كى جمال و كمال؛ أسماءِ إلٰهيه‌يه عائددر و اونلرڭ نقوش و جلوه‌لريدر. مادام او أسماء باقيدرلر و جلوه‌لرى دائميدر؛ ألبته نقشلرى تجدّد ايدر، تازه‌لنير، گوزللشير. عدمه و فنايه گيتمييور؛ بلكه يالڭز إعتبارى تعيّنلرى دگيشير و مدارِ حسن و جمال و مظهرِ فيض و كمال اولان حقيقتلرى و ماهيتلرى و هويتِ مثاليه‌لرى باقيدرلر. ذى‌روح اولميانلر، طوغريدن طوغرى‌يه اونلرده‌كى حسن و جمال أسماءِ إلٰهيه‌يه عائددر، شرف اونلره‌در، مدح اونلرڭ حسابنه گچر، گوزللك اونلرڭدر، محبّت اونلره گيدر. او آيينه‌لرڭ دگيشمه‌سيله اونلره بر ضرر ايراث ايتمز. أگر ذى‌روح ايسه، ذوى العقولدن دگلسه، اونلرڭ زوال و فراقى، بر عدم و فنا دگل؛ بلكه وجودِ جسمانيدن و وظيفۀِ حياتڭ دغدغه‌سندن قورتولوب، قزاندقلرى وظيفه‌نڭ ثمره‌لرينى باقى اولان أرواحلرينه دور ايده‌رك؛ اونلرڭ او أرواحِ باقيه‌لرى دخى برر أسماءِ إلٰهيه‌يه إستناد ايده‌رك دوام ايدر، بلكه كندينه لايق بر سعادته گيدر. أگر او ذى‌روحلر ذوى العقولدن ايسه؛ ذاتًا سعادتِ أبديه‌يه و مادّى و معنوى كمالاته مدار اولان عالمِ بقايه و او صانعِ حكيمڭ دنيادن داها گوزل، داها نورانى اولان عالمِ برزخ، عالمِ مثال، عالمِ أرواح گبى ديگر منزللرينه، باشقه مملكتلرينه بر سير و سفردر؛ بر موت و عدم و زوال و فراق دگل، بلكه كمالاته قاووشمقدر.