ايكنجى مقام

بر مقدّمه، بش إشارتدر. مقدّمه ايكى مبحثدر.

برنجى مبحث: بو گله‌جك بش إشارتده، شئوناتِ ربوبيتى رصد ايتمك ايچون؛ برر سونوك، كوچك دوربين نوعندن برر تمثيل يازيله‌جق. بو تمثيللر؛ شئوناتِ ربوبيتڭ حقيقتنى طوتاماز، إحاطه ايده‌مز، مقياس اولاماز فقط باقديره‌بيلير. او گله‌جك تمثيلاتده و گچن رمزلرده، ذاتِ أقدسڭ شئوناتنه مناسب اولميان تعبيرات، تمثيلڭ قصورينه عائددر.

مثلا: لذّت و سُرور و ممنونيتڭ بزجه معلوم معنالرى، شئوناتِ مقدّسه‌يى إفاده ايده‌مييور؛ فقط برر عنوانِ ملاحظه‌در، برر مرصادِ تفكّردر. هم دخى شو تمثيللر؛ محيط، عظيم بر قانونِ ربوبيتڭ كوچك بر مثالده اوجنى گوسترمكله، ربوبيتڭ شئوناتنده او قانونڭ حقيقتنى إثبات ايدييور. مثلا بر چيچك وجوددن گيدر، بيڭلر وجود بيراقه‌رق اويله گيدر دينيلمش. اونڭله عظيم بر قانونِ ربوبيتى گوسترييور كه؛ بتون بهار، بلكه بتون دنياده‌كى موجوداتده بو قانونِ ربوبيت جريان ايدييور.

أوت خالقِ رحيم، بر قوشڭ تويلى لباسنى هانگى قانونله دگيشديرييور، تازه‌لنديرييور؛ او صانعِ حكيم عين قانونله، هر سنه كُرۀِ أرضڭ لباسنى تجديد ايدر. هم او عين قانونله، هر عصرده دنيانڭ شكلنى تبديل ايدر. هم عين قانونله، قيامت وقتنده كائناتڭ صورتنى تغيير ايدوب دگيشديرر.

هم هانگى قانونله ذرّه‌يى، مولوى گبى تحريك ايدرسه؛ عين قانونله كُرۀِ أرضى مجذوب و سماعه قالقان مولوى گبى دونديرييور و او قانون ايله عالملرى بويله چويرييور و منظومۀِ شمسيه‌يى گزديرييور.