هم مثلا: {كَذَّبَتْ ثَمُودُ بِطَغْوٰيهَا ❊ اِذِ انْبَعَثَ اَشْقٰيهَا ❊ فَقَالَ لَهُمْ رَسُولُ اﷲِ نَاقَةَ اﷲِ وَ سُقْيٰيهَا ❊ فَكَذَّبُوهُ فَعَقَرُوهَا فَدَمْدَمَ عَلَيْهِمْ رَبُّهُمْ بِذَنْبِهِمْ فَسَوّٰيهَا ❊ وَلاَ يَخَافُ عُقْبٰيهَا}

ايشته، قَومِ ثمودڭ عجيب و مهمّ حادثاتنى و نتائجنى و سوءِ عاقبتلرينى، بويله قيصه بر قاچ جمله ايله ايجاز ايچنده بر إعجاز ايله سلاستلى و وضوحلى و فهمى إخلال ايتمز بر طرزده بيان ايدييور.

هم مثلا: {وَ ذَا النُّونِ اِذْ ذَهَبَ مُغَاضِبًا فَظَنَّ اَنْ لَنْ نَقْدِرَ عَلَيْهِ فَنَادٰى فِى الظُّلُمَاتِ اَنْ لاَ اِلٰهَ اِلاَّ اَنْتَ سُبْحَانَكَ اِنِّى كُنْتُ مِنَ الظَّالِمِينَ} ايشته {اَنْ لَنْ نَقْدِرَ عَلَيْهِ} جمله‌سندن {فَنَادٰى فِى الظُّلُمَاتِ} جمله‌سنه قدر چوق جمله‌لر مطويدر. او مذكور اولميان جمله‌لر ايسه، فهمى إخلال ايتمييور، سلاستنه ضرر ويرمييور. حضرتِ يونسڭ قصّه‌سنده مهمّ أساسلرى ذكر ايدر، متباقيسنى عقله حواله ايدر.

هم مثلا: سورۀِ يوسفده {اَرْسِلُونِ} كلمه‌سندن {يُوسُفُ اَيُّهَا الصِّدِّيقُ} اورته‌سنده يدى سكز جمله ايجاز ايله طىّ ايديلمش. هيچ فهمى إخلال ايتمييور، سلاستنه ضرر ويرمييور. بو چشيد معجزانه ايجازلر قرآنده پك چوقدر، هم پك گوزلدر.

امّا سورۀِ {ق}ڭ آيتى ايسه؛ اونده‌كى ايجاز پك عجيب و معجزانه‌در. چونكه كافرلرڭ پك مدهش و چوق اوزون و بر گونى أللى بيڭ سنه اولان إستقبالنه و او إستقبالڭ دهشتلى إنقلاباتنده كافرڭ باشنه گله‌جك أليم و مهمّ حادثاته برر برر پارمق باصييور. شمشك گبى فكرى، اونلر اوستنده گزديرييور. او پك چوق اوزون زمانى، حاضر بر صحيفه گبى نظره گوسترييور. ذكر ايديلمه‌ين حادثاتى خياله حواله ايدوب، عالى بر سلاستله بيان ايدر. {وَ اِذَا قُرِئَ الْقُرْاٰنُ فَاسْتَمِعُوا لَهُ وَ اَنْصِتُوا لَعَلَّكُمْ تُرْحَمُونَ}