بر إخطار: تمثيلده‌كى پادشاه، عجزى ايچون، قوماندانلق إسمنڭ مراتبنده مشير و فريق گبى واسطه‌لر قويمشدر. فقط {بِيَدِهِ مَلَكُوتُ كُلِّ شَيْءٍ} اولان قديرِ مطلق، واسطه‌لردن مستغنيدر. واسطه‌لر، صِرف ظاهريدرلر؛ پردۀِ عزّت و عظمتدرلر. عبوديت و حيرت و عجز و إفتقار ايچنده سلطنتِ ربوبيتنه دلاّلدرلر، تماشاگردرلر. معينى دگللر، شريكِ سلطنتِ ربوبيت اولامازلر.

دردنجى شعاع: ايشته أى تنبل نفسم! بر نوع معراج حكمنده اولان نمازڭ حقيقتى؛ سابق تمثيلده بر نفر، محضِ لطف اولارق حضورِ شاهانه‌يه قبولى گبى؛ محضِ رحمت اولارق ذاتِ جليلِ ذو الجمال و معبودِ جميلِ ذو الجلالڭ حضورينه قبولڭدر. {اَﷲُ اَكْبَرُ} دييوب، معنًا و خيالاً ويا نيّةً ايكى جهاندن گچوب، قيدِ مادّياتدن تجرّد ايدوب بر مرتبۀِ كلّيۀِ عبوديته ويا كلّينڭ بر گولگه‌سنه ويا بر صورتنه چيقوب، بر نوع حضوره مشرّف اولوب، {اِيَّاكَ نَعْبُدُ} خطابنه (هركسڭ قابليتى نسبتنده) بر مظهريتِ عظيمه‌در. عادتا، حركاتِ صلاتيه‌ده تكرارله {اَﷲُ اَكْبَرُ اَﷲُ اَكْبَرُ} ديمكله قطعِ مراتبه و ترقّياتِ معنويه‌يه و جزئياتدن دوائرِ كلّيه‌يه چيقماسنه بر إشارتدر و معرفتمز خارجنده‌كى كمالاتِ كبرياسنڭ مجمل بر عنوانيدر. گويا هر بر {اَﷲُ اَكْبَرُ} بر باصامقِ معراجيه‌يى قطعنه إشارتدر. ايشته شو حقيقتِ صلاتدن معنًا ويا نيّةً ويا تصوّرًا ويا خيالاً بر گولگه‌سنه، بر شعاعنه مظهريت دخى، بيوك بر سعادتدر.

ايشته حجده پك كثرتلى {اَﷲُ اَكْبَرُ} دينلمسى، شو سردندر. چونكه حجِّ شريف بِالأصاله هركس ايچون بر مرتبۀِ كلّيه‌ده بر عبوديتدر. ناصلكه بر نفر، بايرام گبى بر يومِ مخصوصده فريق دائره‌سنده بر فريق گبى پادشاهڭ بايرامنه گيدر و لطفنه مظهر اولور. اويله ده: بر حاجى، نه قدر عامى ده اولسه، قطعِ مراتب ايتمش بر ولى گبى عموم أقطارِ أرضڭ ربِّ عظيمى عنوانيله ربّنه متوجّهدر. بر عبوديتِ كلّيه ايله مشرّفدر. ألبته حجّ مفتاحيله آچيلان مراتبِ كلّيۀِ ربوبيت و دوربينيله نظرينه گورونن آفاقِ عظمتِ الوهيت و شعائريله قلبنه و خيالنه گيتدكجه گنيشله‌نن دوائرِ عبوديت و مراتبِ كبريا و اُفقِ تجلّياتڭ ويرديگى حرارت، حيرت و دهشت و هيبتِ ربوبيت {اَﷲُ اَكْبَرُ اَﷲُ اَكْبَرُ} ايله تسكين ايديله‌بيلير و اونڭله او مراتبِ منكشفۀِ مشهوده ويا متصوّره إعلان ايديله‌بيلير. حجدن صوڭره شو معنايى، علوى و كلّى مختلف درجه‌لرده بايرام نمازنده، ياغمور نمازنده، خسوف كسوف نمازنده، جماعتله قيلينان نمازده بولونور. ايشته شعائرِ إسلاميه‌نڭ وَلَوْ سنّت قبيلندن دخى اولسه أهمّيتى شو سردندر.