ينه او سرسرى دونوب ديدى كه: ”يا قطعيًا بڭا إثبات ايت كه؛ بو قوجه مملكتڭ تك بر مالكى، تك بر صانعى واردر. ياخود بڭا ايليشمه.“

جوابًا آرقداشى ديدى: ”مادام عنادڭ ديوانه‌لك درجه‌سنه چيقمش؛ او عنادڭله بزى و بلكه مملكتى بر قهره گرفتار ايده‌جكسڭ. بن ده سڭا اون ايكى برهان ايله گوستره‌جگم كه: بر سراى گبى شو عالمڭ، بر شهر گبى شو مملكتڭ، تك بر اوسته‌سى واردر و او اوسته، هر شيئى إداره ايدن يالڭز اودر. هيچ بر جهتده نقصانيتى يوقدر. بزه گورونمه‌ين او اوسته، بزى و هر شيئى گورور و سوزلرينى ايشيتير. بتون ايشلرى معجزه و خارقه‌در. بتون بو گورديگمز و ديللرينى بيلمديگمز شو مخلوقلر اونڭ مأمورلريدر.“

گل هر طرفه باق، هر شيئه دقّت ايت! بتون بو ايشلر ايچنده گيزلى بر أل ايشله‌يور. چونكه باق، بر درهم (حاشيه ١) قدر قوّتى اولميان بر چكردك كوچكلگنده بر شى، بيڭلر بطمان يوكى قالديرييور. ذرّه قدر شعورى اولميان، (حاشيه ٢) غايت حكيمانه ايشلر گورويور. ديمك بونلر كندى كنديلرينه ايشله‌مييورلر. اونلرى ايشلتديرن گيزلى بر قدرت صاحبى واردر. أگر كندى باشنه اولسه، بتون باشدن باشه بو گورديگمز مملكتده هر ايش معجزه، هر شى معجزه‌كار بر خارقه اولمق لازم گلير. بو ايسه، بر سفسطه‌در.

------------------------------------------------------------

  (حاشيه ١ : آغاجلرى باشلرنده طاشييان چكردكلره إشارتدر
      (حاشيه ٢ : كندى كندينه يوكسلمه‌ين و ميوه‌لرڭ ثقلتنه طايانميان اوزوم چوبوقلرى گبى نازنين نباتاتڭ، باشقه آغاجلره لطيف أللر آتوب صارمه‌لرينه و اونلره يوكلنمه‌لرينه إشارتدر