گل أى آرقداش! شيمدى سڭا گچمش اولان اون برهان قوّتنده قطعى بر برهان داها گوستره‌جگم. گل، بر گمى‌يه بينه‌جگز؛ (حاشيه ١٩) شو اوزاقده بر جزيره وار، اورايه گيده‌جگز. چونكه بو طلسملى عالمڭ آناختارلرى اوراده اولاجق. هم هركس او جزيره‌يه باقييور، اورادن بر شيلر بكله‌يور، اورادن أمر آلييورلر. ايشته باق گيدييورز. شيمدى شو جزيره‌يه چيقدق. باق پك بيوك بر إجتماع وار. شو مملكتڭ بتون بيوكلرى بورايه طوپلانمش گبى، مهمّ إحتفال گورونويور. ايى دقّت ايت. بو جمعيتِ عظيمه‌نڭ بر رئيسى وار. گل داها ياقين گيده‌جگز. او رئيسى طانيمالى‌يز. ايشته باق نه قدر پارلاق و بيڭدن (حاشيه ٢٠) زياده نشانلرى وار. نه قدر قوّتلى سويله‌يور. نه قدر طاتلى بر صحبت ايدييور. شو اون بش گون ظرفنده، بونلرڭ ديدكلرينى بن بر پارچه اوگرندم. سن ده بندن اوگرن. باق او ذات، شو مملكتڭ معجزنما سلطانندن بحث ايدييور. او سلطانِ ذى‌شان، بنى سزلره گوندردى سويله‌يور.

-------------------------------------------------------

 (حاشيه ١٩ : گمى تاريخه و جزيره ايسه عصرِ سعادته إشارتدر. شو عصرڭ ظلماتلى ساحلنده، ميمسز مدنيتڭ گيديرديگى لباسدن صويونوب، زمانڭ دڭزينه گيروب، تاريخ و سِيَر سفينه‌سنه بينوب، عصرِ سعادت جزيره‌سنه و جزيرة العرب ميداننه چيقوب، فخرِ عالمى (ع‌ص‌م) ايش باشنده زيارت ايتمكله بيليرز كه؛ او ذات او قدر پارلاق بر برهانِ توحيددر كه، زمينڭ باشدن باشه يوزينى و زمانڭ گچمش و گله‌جك ايكى يوزينى ايشيقلانديرمش، كفر و ضلالت ظلماتنى طاغيتمشدر.

      (حاشيه ٢٠ : بيڭ نشان ايسه، أهلِ تحقيق ياننده بيڭه بالغ اولان معجزاتِ أحمديه‌در (ع‌ص‌م