مثلا، كُرۀِ أرض أهلِ حكمت نظريله باقيلسه حقيقتى شودر كه: گونش أطرافنده متوسّط بر سيّاره گبى حدسز ييلديزلر ايچنده دونر. ييلديزلره نسبةً كوچك بر مخلوق. فقط أهلِ قرآن نظريله باقيلديغى وقت (اون بشنجى سوزده ايضاح ايديلديگى گبى) حقيقتى شويله‌در كه: ثمرۀِ عالم اولان إنسان؛ أڭ جامع، أڭ بديع و أڭ عاجز، أڭ عزيز، أڭ ضعيف، أڭ لطيف بر معجزۀِ قدرت اولديغندن، بشيك و مسكنى اولان زمين؛ سمايه نسبةً مادّةً كوچكلگيله و حقارتيله برابر معنًا و صنعةً بتون كائناتڭ قلبى، مركزى.. بتون معجزاتِ صنعتنڭ مشهرى، سرگيسى.. بتون تجلّياتِ أسماسنڭ مظهرى، نقطۀِ محراقيه‌سى.. نهايتسز فعاليتِ ربّانيه‌نڭ محشرى، معكسى.. حدسز خلاّقيتِ إلٰهيه‌نڭ خصوصًا نباتات و حيواناتڭ كثرتلى أنواعِ صغيره‌سندن جوّادانه ايجادڭ مدارى، چارشيسى و پك گنيش آخرت عالملرنده‌كى مصنوعاتڭ كوچك مقياسده نمونه‌گاهى و منسوجاتِ أبديه‌نڭ سرعتله ايشله‌ين تزگاهى و مناظرِ سرمديه‌نڭ چابوق دگيشن تقليدگاهى و بساتينِ دائمه‌نڭ تخمجقلرينه سرعتله سنبلله‌نن طار و موقّت مزرعه‌سى و تربيه‌گاهى اولمشدر.

ايشته أرضڭ بو عظمتِ معنويه‌سندن و أهمّيتِ صنعويه‌سندندر كه، قرآنِ حكيم؛ سماواته نسبةً بيوك بر آغاجڭ كوچك بر ميوه‌سى حكمنده اولان أرضى، بتون سماواته قارشى كوچوجك قلبى، بيوك قالبه مقابل طوتمق گبى دنك طوتويور. اونى بر كفه‌ده، بتون سماواتى بر كفه‌ده قويويور، مكرّرًا {رَبُّ السَّمٰوَاتِ وَ اْلاَرْضِ} دييور. ايشته سائر مسائلى بوڭا قياس ايت و آڭلا كه: فلسفه‌نڭ روحسز، سونوك حقيقتلرى؛ قرآنڭ پارلاق، روحلى حقيقتلريله مصادمه ايده‌مز. نقطۀِ نظر آيرى آيرى اولديغى ايچون، آيرى آيرى گورونور.